Պատգամավորական մանդատը ստանալուց անմիջապես հետո ԱԺ «Իմ քայլը» խմբակցությունից դուրս եկած սյունեցի պատգամավոր Աննա Գրիգորյանն այսօր ԱԺ-ում հայտարարել է, թե ԱԺ-ում է հայտնվել, որովհետեւ սյունեցիները իրեն ձայներ են տվել, հետեւաբար ճիշտ չէ ասել, որ ինքը եղել է «Քաղաքացիական պայմանագրի» թիմի մաս:
Այս կապակցությամբ ԱԺ «Իմ քայլը» խմբակցության պատգամավոր, «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանն իր ֆեյսբուքյան էջում հրապարակել է դեռ 2018-ին նախընտրական քարոզարշավի ժամանակ Աննա Գրիգորյանի ֆեյսբուքյան էջում արված մի գրառում, որում նա հրապարակել է իր եւ Նիկոլ Փաշինյանի համարները քվեաթերթիկում եւ կից ներկայացրել իրենց համատեղ լուսանկարը:
«1-ին նկարում նորընծա քոչարյանական տիկինը պատմում է, թե ինչպես է հայտնվել խորհրդարանում։ 2-րդ նկարում պատկերված է պրոցեսը, որով, տիկինը ձայն էր խնդրում սյունեցուն։
Շատ, անչափ, անպատմելի հատկանշական է, որ 4-րդ քվեաթերթիկը «Նիկոլ Փաշինյանին ընտրելու համար» էր 2018-ին՝ ըստ տիկնոջ, բայց 2021-ին իրականությունը, իհարկե, հետին թվով, բայց փոխվել է»,- գրել է Ալեքսանյանը։
