ՌԴ արտգործնախարար Սերգեյ Լավրովն աշխատանքային այցերով մայիսի 5-6-ը կժամանի Երևան, իսկ մայիսի 10-11-ը՝ Բաքու: Այս մասին իր ճեպազրույցում հայտնել էր Ռուսաստանի ԱԳՆ պաշտոնական ներկայացուցիչ Մարիա Զախարովան՝ չհստակեցնելով այցի օրակարգը։
Ռուսաստանցի քաղաքագետ Ստանիսլավ Տարասովի կարծիքով՝ նոյեմբերի 10-ին կնքված համաձայնագրից հետո կա անհրաժեշտություն հետևել դրա դրույթների իրականացմանը.«Պուտինն այս ընթացքում շփվել է թե՛ վարչապետ Փաշինյանի և թե՛ նախագահ Ալիևի հետ, աշխատում է նաև փոխվարչապատերի խումբը։ Այդուհանդերձ՝ չնայած անգամ հրադադարի համաձայնագրին, տեղեկատվական պատերազմը շարունակվում է։ Ալիևն առաջ է քաշում իր պայմանները, Հայաստանն իր, առաջանում է խնդիրների մի ամբողջ հակամարգ, որը լուծման կարիք ունի»,-«Առաջին լրատվական»-ի հետ զրույցում ասաց նա։
Խոսելով Մինսկի խմբի գործունեության մասին, մեր զրուցակիցը նկատեց որոշակի ակտիվություն.«Դուք գիտեք, որ տեղի է ունեցել ԱՄՆ պետքարտուղար Բլինկենի ու Ալիևի հեռախոսազրույցը, եղել են Մինսկի խմբի հայտարարություններ։ Մինսկի խումբը ամենայն հավանականությամբ կզբաղվի հումանիտար հարցերով, ինչը ցանկանում է Ալիևը, բայց միևնույն ժամանակ կա Արցախի չլուծված կարգավիճակի խնդիրը։ Ալիևն ընդհանրապես համարում է, որ հակամարտությունը կարգավորված է ու Մինսկի խմբի գործունեության անհրաժեշտություն չկա, Ռուսաստանը սակայն այդպես չի կարծում ու շարունակում է շփումներ պահպանել Մինսկի խմբի հետ ու ջանքեր գործադրել, որ Մինսկի խմբի գործունեությունը շարունակվի։ Կա վտանգ, որ կնքված հրադադարը կայուն չի լինի ու հնարավոր է որոշակի առճակատում։ Եվ որպեսզի դա տեղի չունենա Երևանի ու Բաքվի միջև պետք է երկխոսություն ակտիվանա։ Հենց նման խնդիրներ փորձելու է լուծել Լավրովը իր այցի ընթացքում»,-նկատեց Տարասովը։
Քաղաքագետը նշեց՝ չի կարող մեծ վստահությամբ նշել, որ Հայաստանի ու Ադրբեջանի միջև երկխոսություն կհաստատվի, բայց դրա նախադրյալները կան. «Խանգարում է տեղեկատվական արշավը։ Ադրբեջանը ոչ մի կերպ դուրս չի գալիս պատերազմի էյֆորիայից, իսկ Հայաստանը շարունակում է տանել պարտության սինդրոմը։ Ժամանակ է պետք, որպեսզի կողմերը քաղաքական վստահություն ունենան միմյանց նկատմամբ։ Միանգամից դա հնարավոր չէ, բայց շանս կա»։
Ինչ վերաբերում է Լեռնային Ղարաբաղի կարգավիճակի խնդրին, մեր զրուցակիցը նկատեց. «Հարցն այն է, որ Մինսկի խումբն իր օրակարգը չի թարմացրել։ Միայն ասում են, որ պատրաստ են երկխոսությունը վերականգնել։ Սա նշանակում է, որ գործում է հին օրակարգը, ինչն էլ ենթադրում է քննարկում կարգավիճակի շուրջ»,-եզրափակեց նա։
