Հոլանդական De Volkskrant պարբերականի հաղորդմամբ՝ Թուրքիայի ֆուտբոլային ընտրանու գլխավոր մարզիչ, հոլանդացի Գուս Հիդինգը հայտարարել է, որ հրաժարական կտա, եթե պարզվի, որ իր ղեկավարած թիմը ներգրավված է պայմանավորված խաղերի սկանդալում։
Ներկայումս Հիդինգը պատրաստվում է Էստոնիայի հետ ընկերական հանդիպմանը, որը տեղի է ունենալու օգոստոսի 10-ին։ Հիդինգն ընդգծել է, որ մարզական հավաքից առաջ զրուցել է ազգային թիմի խաղացողների հետ և հայտնել, որ իրենց խաղով նրանք կարող են վերականգնել թուրքական ֆուտբոլի խաթարված հեղինակությունը։
Հիշեցնենք, որ հոլանդացի մասնագետի և Թուրքիայի ֆուտբոլային ընտրանու պայմանագիրը կնքվել է 2010 թվականի փետրվարի 14-ին, սակայն հոլանդացի մասնագետը պաշտոնապես Թուրքիայի ընտրանու գլխավոր մարզչի պաշտոնն ստանձնել է օգոստոսի 1-ին:
Արդեն մի քանի ամիս է, ինչ Թուրքիայում ընթանում է պայմանավորված խաղերի հետաքննությունը։ Կասկածի տակ է Թուրքիայի ֆուտբոլի առաջնության միանգամից 19 խաղ։ Գործի շրջանակներում ձերբակալվել են բազմաթիվ խաղացողներ, մարզիչներ, ակումբների ղեկավարներ ու աշխատակիցներ։
Հետաքննության պատճառով Թուրքիայի ֆուտբոլային առաջնության 2011/12 մրցաշրջանի մեկնարկը կարող է հետաձգվել մեկ ամսով։
