Եվրոպա լիգայի խաղարկության կիսաեզրափակչի առաջին խաղում «Ռոման» հյուրընկալվելիս 6։2 հաշվով ջախջախիչ պարտություն կրեց «Մանչեսթեր Յունայթեդից»։ Հիշեցնենք, որ «Օլդ Տրաֆորդ» մարզադաշտում տեղի ունեցած մրցավեճում հաշիվը բացեցին «Մանչեսթեր Յունայթեդի» ֆուտբոլիստները․ 9-րդ րոպեին աչքի ընկավ Ֆերնանդեսը: «Ռոմա» 15-րդ րոպեին հավասարեցրեց հանդիպման հաշիվը: Իսկ առաջին կեսի ավարտին նույնիսկ առաջ անցավ հաշվի մեջ: Աչքի ընկավ Զեկոն:Երկրորդ կեսում «Մանչեսթեր Յունայթեդ» ուղղակի կապիտուլյացիայի ենթարկեց մրցակցին՝ խփելով 5 գնդակ դարպասը: Դուբլի հեղինակ դարձավ Կավանին և Ֆերնանդեսը, մեկական անգամ էլ գոլ խփեցին Պոգբան և Գրինվուդը: Հայաստանի ֆուտբոլի ազգային թիմի կիսապաշտպան Հենրիխ Մխիթարյանը «Ռոմայի» մեկնարկային կազմում էր և մասնակցեց ամբողջ խաղին:
Գեյմ, սեթ և մատչ․ «Ռոման» պարտվեց թենիսային հաշվով և ըստ էության թենիսի տերմինալոգիային համապատասխան։ «Ռոման» պարտվեց պայքարի առաջին խաղում կամ սեթում, և մեծ հաշվով նաև դիմակայությունում։ Եզրափակիչ փուլ դուրս գալու համար իտալական թիմին անհրաժեշտ է հաղթել առնվազն 4։0 հաշվով, ինչը գործնականում հնարավոր չէ։ Երեկվա խաղում Պուլու Ֆոնսեկայի թիմը «Մանչեսթեր Յունայթեդին» զիջեց խաղային բոլոր առումներով։ «Ռոման» հրաժեշտ կտա Եվրոպա լիգային և չի մասնակցի 2021/2022 թթ Չեմպիոնների լիգայի խաղարկությանը։ Հայտնի է նաև, որ մրցաշրջանի ավարտին Ֆոնսեկան հրաժեշտ կտա «Ռոմայի» գլխավոր մարզչի պաշտոնին։ Նախօրեին իտալական մամուլում տեղեկություն էր տարածվել, որ Չեմպիոնների լիգայի խաղարկության ուղեգիր չնվաճելու պարագայում «Ռոման» կհրաժարվի մի քանի առաջատար ֆուտբոլիստներից, այդ թվում նախ Մխիթարյանից։ Ա սերիայում «Ռոման» միայն 7-րդն էր և լավագույն քառյակում հայտնվելու հնարավորություն ըստ էության չունի։ Իտալիայի առաջնությունում Չեմպիոնների լիգայի խաղարկության մասնակցելու հնարավորություն են ստանում 1-4-րդ հորիզոնականները զբաղեցրած թիմերը։ «Մխիթարյանը դեմ չէ «Ռոմայում» կարիերան շարունակելուն: Նա լավ է զգում Հռոմում, բնակվում է ընտանիքի հետ: Ամեն ինչ կախված է նրանից, թե ով կգլխավորի «Ռոման և կհաջողվի արդյոք ձեռք բերել Չեմպիոնների լիգայի ուղեգիր» ,- գրել էր իտալական մամուլը։ Ֆոնսեկան վստահում է Մխիթարյանին և այս մասնագետի գլխավորությամբ հայ ֆուտբոլիստը դարձել էր Հռոմի թիմի առաջատարը։ Թենիսային հաշվով պարտությունից հետո հայ ֆուտբոլիստի «Ռոմայում» մնալը քիչ հավանական է թվում։ Հիշեցնենք, որ տարածված տեղեկության համաձայն «Յուվենտուսի» ղեկավարությունը բանակցություններ է վարում Մխիթարյանի հետ։
Մոտ մեկ ամիս առաջ իտալական մամուլը գրել էր, որ Մխիթարյանն ու «Ռոման» համաձայնության են եկել նոր պայմանագրի հարցում: Այն պետք է կնքվեր դեռևս անցյալ տարի, երբ հայ ֆուտբոլիստը թիմի կազմում անցկացրել էր նախապես պայմանավորված 25 հանդիպումները: Լրատվամիջոցները գրում էին նաև, որ Մխիթարյանի գործակալ Մինո Ռայոլան պահանջել էր կնքել երկու տարվա պայմանագիր, առանց աշխատավարձի կրճատման, ինչին համաձայն չեն եղել ակումբում: Ավելին, հաշվի առնելով վերջին շրջանում Մխիթարյանի արդյունավետ ելույթները՝ Մխիթարյանի գործակալ Ռայոլան պահանջել էր նաև Մխիթարյանի աշխատավարձի բարձրացում։ Ըստ իտալական լրատվամիջոցների՝ Հայաստանի հավաքականի ավագը «Ռոմայում» ստանում է տարեկան 3.5 միլիոն եվրո աշխատավարձ։ Վերջին զարգացումները հուշում են, որ «Ռոման» Մխիթարյանի պահելու ռեսուրս և միջոցներ ուղղակի չի ունենա։
Պայմանագրի չերկարաձգելու դեպքում մրցաշրջանի ավարտին Մխիթարյանը կստանա ազատ խաղացողի կարգավիճակ և առանց ֆինանսական փոխհատուցման նա կարող է հայտվել «Յուվենտուսին»։ Վերջինս ըստ աղբյուրի Հայաստանի ազգային հավաքականի ավագին պատրաստ է տարեկան վճարել 5 միլիոն եվրո։
