Ֆրանսիայի Վալ դ’Ուազ դեպարտամենտից ընտրված պատգամավոր Ֆրանսուա Պուպոնին նոր բանաձև է ներկայացրել երկրի խորհրդարան, որով Ֆրանսիային կոչ է անում պահանջել Ադրբեջանից վերադարձնել ռազմական գործողությունների հետևանքով գերեվարված զինծառայողներին և քաղաքացիական անձանց: Նա այդ մասին գրել է Facebook–ի իր էջում՝ հրապարակելով բանաձևի նախագիծը:
«Արցախում Ադրբեջանի հետ հակամարտությունից հետո հայ զինվորներից շատերը դեռ ձերբակալված են Ադրբեջանի իշխանությունների կողմից և սպասում են հայրենադարձությանը: Այս պրակտիկան բացարձակապես հակասում է Ժնևի կոնվենցիային և միջազգային իրավունքով սահմանված նորմերին: Ֆրանսիան պետք է Ադրբեջանին կոչ անի նրանց ազատ արձակել, դա է իմ բանաձևի իմաստը»,- նշել է պատգամավորը: Պուպոնին շնորհակալություն է հայտնել այն պատգամավորներին, որոնք համաձայնել են ստորագրել բանաձևը։
Քաղաքագետ Ռոբերտ Ղևոնդյանի կարծիքով՝ հետպատերազմյան շրջանում Հայաստանի սուբյեկտայնության որոշակի նվազմանը զուգահեռ Ֆրանսիան փորձում է Հայաստանի շահերի արծարծման որոշակի հարթակ դառնա. «Սա համապատասխանում է թե՛ Հայաստանի և թե՛ Ֆրանսիայի շահերին, որը տարածաշրջանում հաստատման ու վերադարձի նշաններ է ցույց տալիս։ Մենք կարող ենք հիշել, որ մինչև Ցեղասպանությունը, Առաջին համաշխարհային պատերազմը Ֆրանսիան բավականին մեծ ներկայացվածություն ուներ տարածաշրջանում, սակայն նաև իրենց սխալների պատճառով դուրս մղվեցին տարածաշրջանից։ Այսօր Ֆրանսիան փորձում է ակտիվ դերակատարություն ստանձնել տարածաշրջանում։ Հիշեցնեմ՝ Հայաստանում տեղի ունեցած Ֆրանկոֆոնիայի գագաթաժողովը, հետպատերազմյան շրջանում էլ Ֆրանսիան բավականին ակտիվ է։ Առաջին հայացքից գուցե տարօրինակ է, բայց ընդհանուր առմամբ զարմանալի չէ, որ Ֆրանսիայի նախագահը շնորհակալություն է հայտնում ԱՄՆ նախագահ Բայդենին՝ Հայոց Ցեղասպանությունը ճանաչելու համար»,-«Առաջին լրատվական»-ի հետ զրույցում ասաց նա։
Մեր զրուցակցի խոսքերով՝ այս ամենը նշաններ են, որ Ֆրանսիան էլ իր հերթին փորձեր է անում Հայաստանի միջոցով իր ներկայությունը տարածաշրջանում ապահովելու համար.«Կոնկրետ գերիների հետ կապված Ֆրանսիայի կողմից իրականացվող քաղաքականությունը միջազգային ճնշման գործոններից մեկն է։ Սրանք բոլորը հնարավորություններ են, Հայաստանի համար՝ աշխարհաքաղաքական իրավիճակի հավասարակշռության գալու փորձեր են, որտեղ Հայաստանը պետք է քրտնաջան օրուգիշեր աշխատի, որպեսզի կարողանա հնարավորինս շատ շահեր տեղավորել այս տրամաբանության մեջ»,-եզրափակեց նա։
Քաղաքագետ Անդրիաս Ղուկասյանի կարծիքով՝ շատ կարևոր է, որ Ֆրանսիայի խորհրդարանում նման նախագիծ է առաջարկվել.«Ես ենթադրում եմ, որ այն կընդունվի, կհավաքի մեծամասնության ձայները։ Մենք գիտենք, որ Ֆրանսիայի բոլոր քաղաքական ուժերը կոնսենսուսով՝ անցած տարի նոյեմբերի 25-ին ընդունել են մի բանաձև, որը դատապարտում է Ադրբեջանի կողմից ռազմական ագրեսիան և պահանջում է հետաքննություն անել բոլոր ռազմական հանցագործությունների հետ կապված, որոնք տեղի են ունեցել խաղաղ բնակչության դեմ՝ արգելված զենքի կիրառման արդյունքում։ Նաև՝ կառավարությանը կոչ էր արվում ճանաչել Արցախի Հանրապետությունը ու այդ ճանաչումը խաղաղ կարգավորման համար գործիք դարձնել։Այդ տրամաբանության մեջ ես կարծում եմ, որ Ֆրանսիայի կարևոր պատվիրակության Հայաստան այցելությունից հետո և ընդհանուր իրավիճակի մեջ՝ մթնոլորտն այնպիսին է, որ Հայաստանին պետք է հնարավորինս աջակցեն ու օգնեն այս իրադրության մեջ»։
Մեր զրուցակիցը կարծում է, որ մեր կողմից պետք է հանդիպակաց քայլեր արվեն.«Շատ հստակ է ինձ համար, որ Ֆրանսիան մեր բարեկամ պետությունն է ու մեր շահերն այսօր լիովին համընկնում են նաև Ֆրանսիայի շահերի հետ։ Այսինքն՝ Հայաստանը պետք է եղած քաղաքական հնարավորությունները հնարավորինս կապիտալիզացիայի ենթարկի և դարձնի միջազգային հարաբերությունների պայմանագիր։ Մեր կուսակցությունը հանդես է գալիս կողմ՝ Հայաստանի ու Ֆրանսիայի միջև ռազմքաղաքական համաձայնագիր կազմելու օգտին։ Մենք գտնում ենք, որ մեր բանակի արդիականացումը պետք է իրականացվի եվրոպական չափանիշներին համապատասխան»,-եզրափակեց նա։
