Հայաստանը դիտարկում է երկիր մուտքը դարձնել հնարավոր նաև պատվաստումը հաստատող փաստաթղթի առկայության դեպքում. գործող կարգի համաձայն՝ ներկայում երկիր մուտքը թույլատրվում է 72 ժամվա վաղեմության թեստի բացասական պատասխանով: «Արմենպրես»-ի հետ զրույցում ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, Իմունականխարգելման ազգային ծրագրի ղեկավար Գայանե Սահակյանը նշեց, որ շրջանառության մեջ են դրել առաջարկություն, ըստ որի՝ Հայաստան եկող քաղաքացիները կարող են երկիր մուտք գործել նաև պատվաստված լինելու պարագայում:
«Դա չի նշանակում, որ եթե անձը պատվաստված է, ապա ինչպես ու երբ ցանկանա կարող է գալ, բնականաբար մենք առաջարկում ենք կոնկրետ պահանջներ: Մասնավորապես, անձը պետք է ստացած լինի պատվաստանյութի երկրորդ դեղաչափը ու դրանից առնվազն երկու շաբաթ անցած լինի: Պահանջներից մեկն է նաև լինելու, որ պատվաստելու հանգամանքը հաստատված լինի համապատասխան փաստաթղթով՝ ստորագրությամբ ու կնիքով: Այսինքն՝ լինի այնպիսի փաստաթուղթ, ինչպես օրինակ պահանջվում է ՊՇՌ թեստի համար»,-ասաց Գայանե Սահակյանը:
Ներկայում առաջարկը շրջանառության մեջ է դրված և ակնկալվում է ստանալ տարբեր գերատեսչությունների կարծիքները: ՀՀ էկոնոմիկայի նախարարությունից արդեն ստացվել է արձագանք: Գերատեսչությունը շատ ողջունել է այս քայլը:
«Կարծում եմ, որ դա կօգնի մեր տնտեսությանը, զբոսաշրջությանը: Առաջարկն ամբողջացնենք ու ներկայացնենք գործադիրին, տեսնենք կառավարությունը կընդունի՞, թե ոչ: Ի դեպ, ասեմ, որ չկա միջազգային համընդհանուր մոտեցում, թե ինչպիսին պետք է լինի այդ գործընթացը: Յուրաքանչյուր երկիր ինքն է որոշում ու սահմանում: Կան երկրներ, որոնք գնում են այդ ճանապարհով օրինակ, Հունաստանը, Իսրայելը: Այդ երկրները կամ պահանջում են 72 ժամվա վաղեմությամբ ՊՇՌ թեստ կամ պատվաստում»,-ասաց Գայանե Սահակյանն՝ ընդգծելով, որ «կամ-կամ»-ի սկզբունքը նաև Հայաստանում է լինելու: Պատվաստված լինելու պահանջը չի կարող պարտադիր լինել: Ի վերջո, ամբողջ աշխարհում բավարար քանակով պատվաստանյութեր չկան: Եթե մարդը կարողացել է պատվաստվել ու ունի իր մոտ համապատասխան փաստաթուղթը, ապա երկրորդ դեղաչափը ստանալուց երկու շաբաթ հետո, ներկայացված առաջարկության պահանջներին համապատասխան կարող է մուտք գործել Հայաստան: Եթե չունի, ապա այդ դեպքում 72 ժամ վաղեմության Covid-19 բացասական թեստով կարող է գալ:
Գայանե Սահակյանը նշեց, որ մուտքի պարագայում պատվաստման հանգամանքը հաշվի առնելը Եվրամիությունը նույնպես քննարկում է, դիտարկվում է միանսական հարթակ ստեղծելու հարցը: Ռուսաստանում էլ նման քննարկումներ կան, բայց դա, ըստ Գայանե Սահակյանի, շատ նախնական է, հստակեցումների համար դեռ ժամանակ կպահանջվի: Հարցին, թե արդյոք մուտքի պարագայում պատվաստման հանգամանքը հաշվի առնելու դեպքում կոնկրետ պատվաստանյութի պահանջ նշվում է, Գայանե Սահակյանը նշեց, որ կոնկրետ պատվաստանյութով պատվաստած լինելու պահանջ չկա:
Ներկայում գործող կարգի համաձայն, եթե ՀՀ մուտք գործելիս անձը ներկայացնում է առավելագույնը 72 ժամ վաղեմության Covid-19 բացասական թեստ ու այն հիմնավորող փաստաթղթեր, ապա ազատվում է ինքնամեկուսացումից։ COVID-19-ի թեստի բացասական պատասխանը հավաստող առավելագույնը 72 ժամ վաղեմության սերտիֆիկատը թե ՀՀ, թե օտարերկրյա քաղաքացիները կարող են ներկայացնել նաև Հայաստան ցամաքային հատվածու գալու ժամանակ (սահմանը բաց լինելու պարագայում): Եթե անձը հասել է օդանավակայան կամ սահմանային անցման կետ ու չունի նման սերտիֆիկատ, ապա որոշմամբ նախատեսվում է տեղում իրականացնել նմուշառում, այնուհետև կազմակերպել ինքնամեկուսացում, մինչև ՊՇՌ հետազոտության բացասական արդյունքի ստացումը: Բացասական պատասխանի դեպքում ինքնամեկուսացումից անձը դուրս է գալիս, դրականի դեպքում անցնում բժշկական հսկողության:
