Բուլղարիայի դատախազությունը վեց ռուսաստանցիների կասկածում է 2011-2020 թվականն ընկած ժամանակահատվածում երկրի զինագործական գործարաններում չորս պայթյունների կազմակերպման մեջ, որտեղ պահվում էր բուլղարացի զենքի առևտրական Էմիլիան Գեբրևին պատկանող արտադրանքը: Այս մասին չորեքշաբթի օրը՝ ապրիլի 28-ին կայացած ճեպազրույցի ժամանակ հայտարարել է գլխավոր դատախազի պաշտոնական ներկայացուցիչ Սիյկա Միլևան։
«Որոշակի նմանություն կա զինամթերքի արտադրության գործարանների 4 պայթյուններում, ոչնչացվել է այն արտադրանքը, որը պետք է արտահանվեր Վրաստան և Ուկրաինա։ Հետաքննության տվյալների հիման վրա կարելի է հիմնավորված ենթադրություն անել Բուլղարիայում պայթյունների, երեք բուլղարացի քաղաքացիների թունավորման փորձի և այլ երկրներում պայթյունների միջև փոխկապակցվածության մասին»,- ասել է նա։
Միլևայի խոսքերով՝ պարզվել է, որ Ռուսաստանի վեց քաղաքացիներ Բուլղարիայի տարածքում են գտնվել այն օրերին, որոնք մոտ են պայթյունների օրերին և Էմիլիան Գեբրևի դեմ մահափորձին»:
«Ռուսաստանի քաղաքացիների կողմից ծանր հանցագործություն կատարելու մասին ապացույցներ են հավաքվում»,- հավելել է նա:
Բուլղարիայի դատախազության վարկածով ՝ Գեբրևի դեմ մահափորձը կատարվել է 2015 թվականի ապրիլի 28-ից մայիսի 4-ն ընկած ժամանակահատվածում:
ՌԴ ԱԳՆ պաշտոնական ներկայացուցիչ Մարիա Զախարովան անցյալ տարվա հունվարին բուլղարական կողմի հայտարարությունից հետո նշել էր իրավապահ մարմինների գծով նման իրավիճակում գործելու անհրաժեշտությունը, քանի որ խոսքը քրեական հետապնդման մասին է: Ընդ որում, նա նշել է հետաքննության թույլ և մշուշոտ ապացուցողական բազան և Սոֆիայի մեղադրանքները որակել է որպես հակառուսական արշավի հերթական տարր, որի հետևում կարող են կանգնած լինել այդ երկրի քաղաքական իսթեբլիշմենթի ներկայացուցիչները:
