Սիրիա են մեկնում Հնդկաստանի, Բրազիլիայի և Հարավաֆրիկյան Հանրապետության դեսպանները՝ Սիրիայի իշխանություններին բռնությունները դադարեցնելու կոչ անելու նպատակով: Այս մասին հայտնում է Associated Press-ը՝ հղում անելով ՄԱԿ-ում Հնդկաստանի դեսպանին:
Ըստ նրա՝ Հնդկաստանի դեսպան Դիլիպ Սինխան օգոստոսի 9-ին կժամանի Դամասկոս, որտեղ Բրազիլիայի և Հարավաֆրիկյան Հանրապետության իր պաշտոնակիցների հետ կհանդիպի Սիրիայի արտաքին գործերի նախարարին՝ Սիրիայում բռնությունները դադարեցնելու առաքելությամբ:
Մինչ այդ նման առաքելությամբ Դամասկոս այցելելու պատրաստակամություն էր հայտնել Թուրքիայի վարչապետ Էրդողանը՝ հայտարարելով, որ դա իրենց ներքին գործն է, քանի որ Թուրքիան Սիրիայի հետ ունի ոչ միայն ընդհանուր սահման, այլև պատմական, մշակութային ընդհանրություններ:
Ըստ իրավապաշտպան կազմակերպությունների տվյալների՝ Սիրիայում բախումների հետևանքով արդեն կա 2.6 հազար զոհ:
