«Այսօր Հայաստանում մարդկանց մոտ առկա է արտագաղթելու տրամադրվածություն, բայց թե որքանով այն հիմա կիրականանա, եթե սահմանները բացվեն, չեմ կարող ասել»,- «Առաջին լրատվական»-ի հետ զրույցում ասաց միգրացիոն հարցերով փորձագետ Տաթևիկ Բեժանյանը:
Միայն Ռուսաստանի հետ օդային տարածքի բացվելուց հետո, օդանավակայանի տվյալներով՝ 58 հազարից մի քիչ ավելի մարդ է մեկնել, և միայն 39 հազար քաղաքացի է վերադարձել: Այսինքն՝ արդեն բավական մեծ տարբերություն ունենք մեկնողների։ «Հետևաբար ես կարծում եմ, որ տրամադրվածություն կա: Մի մասն էլ, երկրում առկա անորոշ վիճակով պայմանավորված՝ փորձում է հասկանալ՝ ինչ կլինի դեռևս և նոր որոշում կկայացնի: Հետևաբար կարծում եմ, որ եթե նույնիսկ արտագաղթելու տրամադրվածություն ունեցողները անգամ մտածելու համար մի փոքր սպասեն, ապա հաջորդ տարի որոշում կկայացնեն ու, կարծում եմ, ավելի շատ արտագաղթողներ կունենանք: Ամեն դեպքում միտումներն այդպիսին են,- ասաց Բեժանյանը:
Փորձագետի խոսքերով՝ արտագաղթը բնորոշ է այն երկրներին, որտեղ պատերազմ է եղել: Պատերազմը նպաստում է արտագաղթին: Հայաստանում բուն պատերազմի ժամանակ մենք բավականին մեծ ներհոսք ենք ունեցել և, եթե չլիներ կապիտուլյացիոն պայմանագիրը, դրանով պայմանավորված մարդկանց մոտ հոգեվիճակի կտրուկ անկումը, ապա գուցե մեր երկրում արտագաղթի միտումները այդքան սրված չլինեին, բայց ունենք հակառակ իրավիճակը, մարդկանց մոտ ապագայի նկատմամբ անորոշ իրավիճակ է, ինչը թիվ մեկ ազդակ է, որ մարդկանց մոտ երկիրը լքելու տրամադրվածություն կա:
Մեր հարցին՝ եթե արտահերթ ընտրություններից հետո երկրում որոշակի կայունություն հաստատվի, դա կարո՞ղ է արտագաղթի տրամադրվածություն ունեցող մարդկանց համար որոշակի կանխարգելիչ նշանակություն ունենալ, փորձագետը պատասխանեց. «Ես կդժվարանամ այդ հարցին պատասխանել: Իմ շփումները ցույց են տալիս, որ, ցավոք, մարդիկ առանձնապես հույսեր չեն կապում ընտրությունների հետ: Եվ հետո դժվար է ասել, թե ընտրությունների արդյունքները ինչպիսին կլինեն, ինչ ազդեցություն կունենան: Չի բացառվում անգամ, որ ընտրությունները ևս խթանող գործոն լինեն արտագաղթի համար՝ կախված դրանց արդյունքներից: Մենք դրա նախադեպերն ունեցել ենք, երբ ընտրությունների արդյունքների կեղծումից հետո մարդկանց արտահոսք ենք ունեցել: Չի բացառվում, որ հիմա էլ մարդկանց ակնկալած արդյունքները չլինեն, ու դա նորից արտագաղթի խթան հանդիսանա»:
Ինչ վերաբերում է աշխատանքային միգրանտներին, ապա Բեժանյանն ասաց, որ 2021 թվականի արդյունքները դեռ չի ամփոփել, քանի որ սահմանները բացվել են փետրվարից, և նվազագույնը երեք ամիս է պետք՝ հասկանալու համար, թե մարդիկ միգրացիոն բազայում ինչ նպատակով են միգրացիոն հաշվառման կանգնել՝ աշխատանքի՞, ուսմա՞ն, մասնավոր այցի՞, թե՞ այլ նպատակով. «Ես կարծում եմ, որ ապրիլի վերջ, մայիսի սկիզբ ես կունենամ որոշակի վիճակագրություն՝ ելնելով Ռուսաստանի ֆեդերալ միգրացիոն ծառայության տեղեկատվական բազայից: Այդ տվյալներից պարզ կլինի, թե երեք ամսվա մեջ քանի աշխատանքային միգրանտ ունենք Ռուսաստանի Դաշնությունում»,- եզրափակեց Տաթևիկ Բեժանյանը:
Լուսանկարը՝ panorama.am-ի
