Նախօրեին Մինսկի խմբի համանախագահները հայտարարություն են տարածել, որտեղ կոչ են արել բարձր մակարդակով քաղաքական երկխոսություն սկսել վերջնական և համապարփակ կարգավորման հասնել կողմերին հայտնի տարրերի և սկզբունքների հիմա վրա, նաև վերսկսելու աշխատանքային այցերը տարածաշրջան` իրականացնելու իրենց գնահատման և միջնորդական առաքելությունները: Համանախագահները շեշտում են իրենց պատրաստակամությունը` վերսկսելու աշխատանքային այցերը տարածաշրջան, այդ թվում`Լեռնային Ղարաբաղ և հարակից տարածքներ` իրականացնելու իրենց գնահատման և միջնորդական առաքելությունները, հիշեցնում են իրենց երթուղիների վերաբերյալ անարգել մուտքի և շարժման առավելագույն ճկունություն ապահովելու պահանջի մասին` իրենց ունեցած մանդատին և նախորդ պրակտիկային համապատասխան։
Ակնհայտ է, թե որ կողմին է ձեռնտու նման արգելքներ ստեղծելը։ «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր, արտաքին հարցերի մշտական հանձնաժողովի անդամ Միքայել Զոլյանը՝ հավելելով, որ վերջին ամիսներին մենք տեսնում ենք, որ ադրբեջանական կողմը ուղղակի կամ անուղղակի խոչընդոտներ է ստեղծել։
Նրա կարծիքով՝ համանախագահների կոչը հենց նրան է ուղղված։
Տեսակետ կա, որ խանգարողը հայկական կողմն է, որովհետև ՄԽ-ն ուզում է Արցախ մուտք գործել ոչ թե Լաչինով, այլ Աղդամով։ Պատգամավորը շեշտեց, որ հենց դրա մասին է խոսքը։
«Դրա համար ասում ենք՝ ադրբեջանական կողմը արհեստական խոչընդոտներ է ստեղծում և անընդունելի պայմաններ առաջարկում, պարզ է, որ Մինսկի խումբը նման ցանկություն չպետք է ունենա, թե ինչու պետք է Մինսկի խումբը ուզենա պարտադիր Ադրբեջանի տարածքով գնա, պարզ է, որ այս պայմանները Ադրբեջանի կողմից են դրվում և նպատակ ունեն խափանելու Մինսկ խմբի համանախագահների այցը»,- ասաց պատգամավորը։
Պատգամավորի դիտարկմամբ՝ ողջունելի է Մինսկի խմբի համանախագահների հայտարարությունը, բացի դրանից՝ հայտարարության բովանդակությունը նույնպես հիմքեր է տալիս լավատեսության համար, և եթե իրոք դա իրականացվի, ապա բանակցությունների կամ խաղաղության գործընթացը կարող է վերսկսվի։
Թե որքանով է դա իրատեսական, պատգամավորը դժվարացավ ասել․ «Իհարկե, մենք տեսնում ենք, որ Ադրբեջանի ղեկավարությունը որոշակի ադեկվատության պակաս է ցույց տալիս, և մենք տեսնում ենք, որ այս պահին նրանք կառուցողական երկխոսության պատրաստ չեն, բայց կարծում եմ, որ նրանք էլ վաղ թե ուշ պետք է հասկանան, որ հակամարտությունը լուծված չէ և պետք է փոխեն իրենց մոտեցումները»։
Հարցին՝ Մինսկի խմբի ձևաչափին այլընտրանք չկա՞, Զոլյանը նշեց, որ այս պահին այս հարցը ճիշտ է, իհարկե, միշտ էլ ամեն ինչին այլընտրանք կարելի է գտնել, բայց եթե այս պահին Մինսկի խումբը իր աշխատանքը կատարում է, կարիք չկա այլընտրանքներ փնտրել։ «Այլ հարց է, որ եթե պարզվի այդ աշխատանքը արդյունավետ չէ, նոր կարելի է այդ հարցի շուրջ զրուցել, առայժմ այդպիսի հարցերի համար ես հիմք չեմ տեսնում»,- ասաց նա։
ԱԺ «Իմ քայլը» խմբակցության պատգամավոր, արտաքին հարցերի մշտական հանձնաժողովի անդամ Տաթևիկ Հայրապետյանն էլ, կարևորելով Մինսկի խմբի համանախագահների հայտարարությունը՝ հատկապես այն ֆոնին, որ վերջերս էլ հայկական կողմը շարունակ շեշտում է, որ խնդիրը շարունակում է մնալ չլուծված, առավել ևս Արցախի կարգավիճակի սահմանված չլինելու պարագայում, պետք է շարունակվի բանակցային գործընթացը արդեն հայտնի սկզբունքների և տարրերի հիման վրա։
Ինչ վերաբերում է համանախագահների տեղաշարժերի մուտքերի հետ կապված, ապա, պատգամավորի խոսքերով, ԱԺ-ում կառավարության հետ հարցուպատասխանի ժամանակ ԱԳ նախարարը խոսեց այն մասին, որ հայկական կողմը միշտ պատրաստ է ընդունել համանախագահներին, հայկական կողմը որևէ խնդիր երբևէ չի հարուցել այդ առնչությամբ։ Նա վստահ է, որ հայտարարության այդ հատվածը հաստատ ուղղված չի հայկական կողմին, որովհետև հայկական կողմը միշտ աչքի է ընկել իր կառուցողական դիրքորոշումներով և որևէ խնդիր չեն ստեղծել տեղաշարժերի համար։
Պատգամավորը նշեց, որ Մինսկի խմբին այլընտրանք չկա մեզ համար։