News Georgia-ի փոխանցմամբ՝ Վրաստանի Օկուպացման թանգարանում կիրակի օրը տեղի է ունեցել Իլիա Ճավճավաձեի անվան համալսարանի պրոֆեսոր, լրագրող Օլեգ Պանֆիլովի «Ռուսաստան-Վրաստան տեղեկատվական պատերազմ. Օգոստոս 2008» խորագրով գրքի շնորհանդեսը։ Վերջինս կազմակերպվել է համալսարանի կողմից։
Օլեգ Պանֆիլովի խոսքերով, գրքում տեղ է գտել 2008 թվականի օգոստոսյան պատերազմի վերաբերյալ իր հավաքած տեղեկատվական նյութերի միայն մի մասը։ Հեղինակը հայտարարել է, որ ինքն այնքան նյութեր է հավաքել, որ կարող է հրատարակել տասնյակ այդպիսի գրքեր։
Հիշեցնենք, որ ավելի վաղ նշվում էր, որ Պանֆիլովի գրքում ներկայացվելու է, թե ինչպես են ռուսական լրատվամիջոցները Վրաստանի դեմ քարոզչություն իրականացնում. «Գրքի կարևոր մասը կազմում են Ռուսաստանում անցկացված սոցիոլոգիական հետազոտությունների արդյունքները, որոնք ի ցույց են դնում հասարակական կարծիքի ձևավորումը։ Բերված են քարոզչական բազմաթիվ օրինակներ, որոնք ուղղված են եղել ոչ միայն ռուսական հասարակական կարծիքը փոխելուն, այլև ապատեղեկատվության միջոցով պատերազմ սկսելու հարցում ռուսական տարբերակը հաստատելուն»։
Ի դեպ, այս տարվա ապրիլի 26-ին էլ տեղի էր ունեցել Օլեգ Պանֆիլովի «Չեչնիայի տեղեկատվական շրջափակումը (1996 սեպտեմբեր – 2002 դեկտեմբեր)» խորագրով գրքի շնորհանդեսը։
