Չեխիայում Թուրքիայի դեսպան Ջիհադ Էրգինայը «Ազատություն» ռադիոկայանին տված հարցազրույցում անդրադարձել է Թուրքիայի ներքին խնդիրներին, Սիրիայի իրավիճակին, տարածաշրջանային հարցերին, Թուրքիա-ԵՄ հարաբերություններին, ինչպես նաև Հայաստանի հետ հարաբերությունների կարգավորման գործընթացին:
Պատասխանելով հարցին՝ «Արդյոք պաշտոնական Անկարայի և Երևանի միջև հարաբերությունների վերականգնման հիմնական խոչընդոտը անհամաձայնությո՞ւնն է 1915 թվականի դեպքերի շուրջ, որոնք հայերը որակում են որպես ցեղասպանություն»՝ դեսպանը ասել է.
«Երկու երկրները՝ Թուրքիան և Հայաստանը, տարբեր հիշողություններ ունեն 1915 թվականին տեղի ունեցածի մասին: Հայերը պնդում են, որ դա ցեղասպանություն է, մենք ասում ենք, որ դրանք դժբախտ իրադարձություններ են, որոնք տեղի են ունեցել Առաջին աշխարհամարտի ընթացքում:
Աղետալի իրադարձություններ են տեղի ունեցել, բայց երկու կողմերը պետք է պատշաճ կերպով քննարկեն դրանք։ Մենք դա պետք է թողնենք պատմաբաններին՝ տեսնելու, թե իրականում ինչ է տեղի ունեցել այն ժամանակ և ինչ հետևանքներ է ունեցել։
Չնայած Թուրքիային այդպիսի մեղադրանքներ են ներկայացվում՝ շատերը մոռանում են, որ նույն տարվա՝ 1915 թվականի ընթացքում Թուրքիայի մյուս կողմում տեղի ունեցան Գալիպոլիի իրադարձությունները: Այսինքն՝ այդ ժամանակ Օսմանյան կայսրությունը պայքարում էր շատ ճակատներում:
Այդ ժամանակ կատարվածը, իհարկե, ողբերգություն է, բայց դա պետք է հրապարակայնորեն քննարկվի երկու երկրների պատմաբաններից կազմված հանձնաժողում՝ ինչը տարիներ առաջ առաջարկել է վարչապետ Ռեջեփ Էրդողանը, բայց, դժբախտաբար, չի իրագործվել:
Սակայն մենք հույս ունենք, որ մի օր հայկական կողմը կընդունի այդ առաջարկը, որպեսզի բացենք երկու երկրների միջև հարաբերությունները բարելավելու դարպասները, ինչպես մենք ցանկանում ենք»։
Դեսպանը նաև նշել է, որ Թուրքիան ԵՄ-ի հետ բանակցում է լիարժեք անդամակցության համար և հույս ունի, որ դա վաղ թե ուշ տեղի կունենա:
Էրգինայի խոսքերով՝ դրա համար Թուրքիան բարեփոխվում է, վերջին 10 տարիների ընթացքում նոր երկիր է դարձել, աշխարհի տնտեսապես զարգացած 16-րդ, իսկ Եվրոպայում՝ 6-րդ երկիրն է, մեծ մասնակցություն ունի ՆԱՏՕ-ի գործողություններին: Իրենց թիրախը Եվրամիության անդամ դառնալն է, ու ձգտում են որքան հնարավոր է՝ շուտ հասնել դրան:
Կիպրոսի խնդրի առնչությամբ դեսպանը նշել է, որ շատ ակտիվորեն փորձում են, որքան հնարավոր է, շուտ հասնել լուծմանը: Նա հույս է հայտնել, որ կղզու առաջնորդները, որոնք ՄԱԿ-ի գլխավոր քարտուղարի հովանու ներքո հանդիպումներ են անցկացնում, ի վերջո, կգան համաձայնության: Էրգինայը լիահույս է, որ դա կլինի մինչև այս տարվա վերջը, որովհետև, նրա համոզմամբ, անժամկետ բանակցությունները ոչ մի տեղ չեն տանում:
Սիրիայի իրադարձությունների հետ մասին Չեխիայում Թուրքիայի դեսպանն ասել է, թե կարծում է, որ տարածաշրջանի բոլոր խնդիրները, ներառյալ՝ Սիրիայինը, պետք է լուծվեն երկխոսության, համագործակցության, ժողովրդավարական գործընթացների միջոցով:
«Մեզ մտահոգում է այն, ինչ կատարվում է Սիրիայում, և հույս ունենք, որ վարչակազմի կողմից խոստացված բոլոր բարեփոխումները կկատարվեն»,- ասել է Թուրքիայի դեսպանը:
