Մեծ Բրիտանիայի վարչապետ Բորիս Ջոնսոնը վարձով կհանձնի իր տունը Լոնդոնի մերձակա Օքսֆորդշիր կոմսությունում: Այս մասին գրում է The Times- ը:
Տունն ունի չորս սենյակ, փոքրիկ խոհանոց, ինչպես նաև բուխարի, թենիսի խաղադաշտ և տաքացվող լողավազան: Բացի այդ, տարածքում կա ձմեռային այգի: Տունը կարելի է վարձել ամսական 4250 ֆունտ ստեռլինգով: Առանձնատները վարձակալվում են առնվազն մեկ տարի ժամկետով: Հայտարարության մեջ նշվում է, որ մոտակայքում կան «զբոսնելու հաճելի վայրեր և պանդոկներ»:
Ինչպես նշում է պարբերականը, Ջոնսոնը 2003 թվականին տունը գնել է 690 հազար ֆունտ ստեռլինգով: Այս պահին դրա արժեքը գնահատվում է 1,2 միլիոն ֆունտ ստեռլինգ։
2019-ի հուլիսից Ջոնսոնը և նրա հարսնացու Քերի Սայմոնդսը ապրում են Դաունինգ Սթրիթի չորս սենյականոց բնակարանում: Ըստ թերթի՝ վարչապետն ու նրա ընտանիքը չեն կարող ապրել Օքսֆորդշիրում՝ անվտանգության նկատառումներից ելնելով: