Նաթանզում՝ Իրանի միջուկային օյեկտում, դիվերսիայի պատճառով ուրանի հարստացման գործընթացը չի դադարեցվի։ Ավելին, արտադրական կարողությունները պլանավորվում է 50 տոկոսով մեծացնել: Ապրիլի 12-ին այդ մասին հայտարարել է երկրի փոխնախագահ, Իրանի ատոմային էներգիայի կազմակերպության ղեկավար Ալի Աքբար Սալեհին:
«(Նաթանզի ուրանի) հարստարման «Շահիդ Ահմադի Ռոշան» օբյեկտում երեկվա միջադեպը հարստացման համար խոչընդոտ չէ, համալիրում միացել է վթարային էներգամատակարարումը»,- մեջբերում նրա խոսքն ԻՌԻԲ հեռուստառադիոհաղորդումների կորպորացիան: Իրանի փոխնախագահի խոսքով՝ «ամենակարճ ժամկետներում Նաթանզի օբյեկտը կշարունակի աշխատանքը՝ արտադրողականության 50 տոկոս մեծացմամբ»: Նա հավելել է, որ «մի քանի օրվա ընթացքում իշխանությունները վնասված ցենտրիֆուգները կփոխարինեն ուրիշ՝ ավելի հզոր ագրեգատներով»:
Ապրիլի 11-ին իրանական կողմը հայտնել է, որ Նաթանզի օբյեկտի բաշխիչ էլեկտրացանցում վթար է արձանագրվել: Տուժածներ և շրջակա միջավայրի աղտոտում չի արձանագրվել: Իրանի ատոմային էներգիայի կազմակերպության ղեկավար Ալի Աքբար Սալեհին միջադեպը որակել է «միջուկային ահաբեկչության դրսևորում»: The New York Times թերթը, վկայակոչելով աղբյուրներին, հայտնել է, որ Նաթանզում վթարի պատճառը իսրայելական կողմի կազմակերպած պայթյունն է։ Դրանից հետո միջադեպին Իսրայելի մեղսակցության մասին հայտարարել է Իրանի արտգործնախարարության ղեկավար Մոհամադ Ջավադ Զարիֆը, հաղորդում է ՏԱՍՍ-ը:
