«Գործող իշխանությունները ամեն ինչ պետք է անեն հեղափոխական արժեքների անշրջելիությունն ապահովելու համար: Իսկ նախկին ուժերը, որոնք այս պահին փորձում են վերարտադրվել, կփորձեն լուծել ժողովրդավարության այս ընթացքի կասեցման խնդիրը: Այսինքն՝ այս ընտրությունը լինելու է արժեհամակարգի պայքար, և բախումը քաղաքակրթական մոտեցումների մեջ է»,- «Առաջին լրատվական»-ի հետ զրույցում ասաց Ազգային ժողովի անկախ պատգամավոր Սերգեյ Բագրատյանը և հավելեց, որ առայժմ դեռ որոշում չկա, թե ինքը որ ուժի հետ է մասնակցելու ընտրություններին:
Հարցին՝ այս խճապատկերում քաղաքացիները ինչպե՞ս պետք է կողմնորոշվեն, մեր զրուցակիցը նշեց, որ պետք է առաջնորդվեն այն տրամաբանությամբ, որ ընտրությունները տեղի ունենան առանց ճնշումների. «Եթե որևէ ուժ փորձի ստիպել, կաշառել, բռնանալ քաղաքացու կամքի վրա, հասկանալի է, որ այդ ուժի հետ քաղաքացիները ճանապարհ չպետք է գնան: Մենք քաղաքացուն առաջարկում ենք քաղաքական ընտրության հնարավորություն: Ռեյտինգայինը հանելով և անցնելով փակ համամասնական ընտրակարգի՝ քաղաքացին այլևս պարտադրված չի լինի ընտրել իր հարևանի տղային կամ բաջանաղի եղբորը: Նա ազատ է զուտ քաղաքական ընտրություն կատարելու»:
Սերգեյ Բագրատյանը, սակայն, վստահ է, որ կլինեն ուժեր, որոնք կփորձեն ապաքաղաքականացնել ընտրությունները. «Նրանք, չունենալով այն ընտրազանգվածը, որը նրանց համապատասխան քվե կբերի, կդմեն իրենց հատուկ մեթոդների՝ ճնշումների, հեղինակությունների, ֆինանսական ռեսուրսների օգտագործմամբ: Քաղաքացին պետք է պատրաստ լինի անձամբ պայքարելու նման երևույթների դեմ»:
Առավել մանրամասն՝ տեսանյութում:
