Հայաստանի արտգործնախարար Արա Այվազյանը մարտի 11-ին այցելել է Արաբական Միացյալ Էմիրություններ, որտեղ հանդիպում կունենա այդ երկրի արտաքին գործերի նախարարի հետ: Այցը անկասկած բավականին կարևոր է մի շարք առումներով և պատճառներով:
Արաբական աշխարհը Հայաստանի համար պետք է լինի արտաքին քաղաքական և անվտանգային ռազմավարական ուղղություն: Այստեղ անշուշտ առանցքայինը լոկ այդ աշխարհի և Թուրքիայի ներկայիս խնդիրները չեն, այն չէ, որ արաբական երկրները այսօր Թուրքիայի քաղաքականության կոշտ ընդդիմախոսներ են և ձևավորում են հակաթուրքական որոշակի կոալիցիա: Թեև այդ հանգամանքն էլ իհարկե ունի հիմնարար նշանակություն Հայաստանի շուրջ ներկայիս անվտանգային, ռազմաքաղաքական միջավայրի համատեքստում: Իհարկե, այդ հանգամանքը Երևանի համար պետք է դիտարկվի իբրև միջոց՝ թե՛ Թուրքիային զսպելու հավելյալ մեխանիզմների տրամաբանության շրջանակում, թե՛ նաև այդպիսով Թուրքիային Հայաստանի հետ երկխոսության, ոչ թե շանտաժի ու սպառնալիքի քաղաքականության դաշտ բերելու համար: Իհարկե, դա բավականին բարդ և ժամանակատար խնդիր է, բայց դրա լուծման ուղղությամբ քայլերը Հայաստանին պետք են:
Միևնույն ժամանակ, հակաթուրքական այդ գործոնը չպետք է լինի Հայաստանի և արաբական աշխարհի հետ հարաբերության հիմնական կամ նույնիսկ գերակա շարժիչը: Արաբական աշխարհը համաշխարհային քաղաքականության շրջանակում ունի առանցքային աշխարհակարգային դերակատարում թե՛ տնտեսական, թե՛ քաղաքական իմաստով: Այդ առումով Հայաստանը գտնվում է քաղաքական և անգամ քաղաքակրթական շահերի որոշակի ընդհանրություն ձևավորող վեկտորի վրա, և այստեղ արաբական պետությունների հետ պետք է կառուցել ռազմավարական երկխոսություն լայն ճակատով ու հեռանկարով, որպեսզի նաև հայ-արաբական հարաբերությունը չդառնա հայ-թուրքական հարաբերության հետ կապված հեռանկարի պատանդ:
Միաժամանակ, ընթացիկ քաղաքական զարգացումների առումով Հայաստանի համար բավականին զգայուն կետեր են պարունակում երկու գործընթաց՝ արաբա-իսրայելական հաշտեցման գործընթացը, դրա ներկայիս վիճակն ու հեռանկարները: Ի դեպ, ըստ տեղեկությունների՝ մարտի 11-ին Աբու Դաբի է մեկնում նաև Իսրայելի վարչապետ Նեթանյահուն, այն էլ՝ Իսրայելում խորհրդարանի արտահերթ ընտրությունից տասն օր առաջ: Դա լինելու է Նեթանյահուի առաջին այցը Միացյալ Էմիրություններ:
Հայաստանի արտգործնախարարի՝ Էմիրություններ այցի համատեքստում առանձնահատուկ մեկ այլ հանգամանք է այն, որ շաբաթներ առաջ հանգուցալուծվեց Կատարի և արաբական մյուս պետությունների միջև լարվածությունը, ինչը ևս ռեգիոնալ անվտանգային միջավայրի վերափոխման շոշափելի, Հայաստանի համար ողջունելի միտում է:
Լուսանկարը՝ Armeniasputnik-ի