Այսօր «Ժառանգություն» խմբակցության ղեկավար Ստեփան Սաֆարյանը, կուսակցության մամլո խոսնակ Հովսեփ Խուրշուդյանը Նալբանդյան 106/1 և Կոմիտասի 5 հասցեների հարակից շենքերի բնակիչների ու ներկայացուցիչների հետ միասին Երևանի քաղաքապետարանում գլխավոր ճարտարապետ Նարեկ Սարգսյանի հետ քննարկեցին հիշյալ հասցեներում դադարեցված քաղաքաշինական ծրագրերին առնչվող հարցեր:
Հուլիսի 28-ին տեղի ունեցած առաջին քննարկման ժամանակ Երևանի գլխավոր ճարտարապետի առաջարկով պայմանավորվածություն էր ձեռքբերվել՝ երկրորդ հանդիպման ընթացքում քննարկել կոնկրետ գաղափարներ և առաջարկներ՝ հաշտեցնելու համար բոլոր կողմերի՝ բնակիչների, կառուցապատողների և Երևան համայնքի շահերը և գտնել ընդունելի լուծումներ: Այդպիսի առաջարկներից մեկն էլ ներկայացվեց քննարկման մասնակիցներին: Բնակիչները պնդեցին, որ համաձայն չեն իրենց բակերում բարձրահարկ շենքերի կառուցմանը, ինչը կվատթարացնի շրջակա միջավայրը և կվնասի կենսական պայմաններին:
«Ժառանգության» ներկայացուցիչները բարձրացրեցին Երևան քաղաքում կառուցապատման հայեցակարգին ու ռազմավարությանն առնչվող հարցեր, հիմնավորումներ ներկայացրեցին քաղաքի կենտրոնում, այն էլ՝ բակային տարածքներում բարձրահարկ շենքերի կառուցման աննպատակահարմարության վերաբերյալ: Առաջարկվեց քաղաքի պահուստային ֆոնդերից ներդրողներին կառուցապատման համար տրամադրել այլ տարածքներ: Երևանի գլխավոր ճարտարապետը տեղեկացրեց, որ աշխատում են նման հայեցակարգ ձևակերպելու ուղղությամբ և իր հերթին շարադրեց սեփական պատկերացումները դրա կապակցությամբ:
Նալբանդյան 106/1 հասցեում դադարեցված քաղաքաքաշինական ծրագրի կապակցությամբ Նարեկ Սարգսյանն առաջարկեց աշխատանքները շարունակել հավասարակշռված լուծումներ գտնելու ուղղությամբ, որոնք բնակիչների ներկայացուցիչներին կներկայացվեն հաջորդ քննարկմանը: Նա նաև տեղակցրեց, որ իր ուշադրության կենտրոնում է գտնվում Պուշկին 38 հասցեի հարցը և կառուցապատողին կոնկրետ առաջարկներ կներկայացվի օգոստոսի երկրորդ կեսին: Ծանոթանալով Կոմիտաս 5 հասցեի հետ կապված խնդիրներին, Նարեկ Սարգսյանը նշեց, որ առաջիկա օրերին ստուգայցով կլինի նաև նշված տարածքում՝ տեղում իրավիճակին ծանոթանալու և լուծումներ գտնելու նպատակով:
Հիշեցնենք, որ նախորդ քննարկման ժամանակ Երևանի գլխավոր ճարտարապետը Ստեփան Սաֆարյանին հայտնել էր, որ Վիշապի պուրակների խնդրով սպառիչ լուծում է տրված՝ կառուցապատողին առաջարկվել է համարժեք այլ տարածք, և նման լուծումները բացառված չեն նաև այլ վիճահարույց քաղաքաշինական ծրագրերի դեպքում ևս:
