ՀՀ երրորդ նախագահ Սերժ Սարգսյանի նախօրեին հրապարակված հարցազրույցը ակտիվ քննարկումների առիթ է հանդիսացել: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ անկախ պատգամավոր Սերգեյ Բագրատյանը և «Լուսավոր Հայաստան» խմբակցության պատգամավոր Կարեն Սիմոնյանը:
Ո՞ւմ էր ուղղված այս հարցազրույցը և որքանով է այն օգտակար: Այս հարցին ի պատասխան՝ Սերգեյ Բագրատյանը կարծիք հայտնեց, որ Սերժ Սարգսյանը երկու խնդիր էր դրել իր առջև. «Առաջինը՝ տարանջատվել գործող իշխանության հետ որևէ կապից, քանի որ հանրային դիսկուրսներում անընդհատ նշվում է, որ Նիկոլ Փաշինյանը Սերժ Սարգսյանի պրոյեկտն է, եկավ ժամանակը և Սերժ Սարգսյանը հստակեցրեց, որ ինքը որևէ կերպ կապ չունի գործող իշխանության հետ: Եվ երկրորդ՝ սրանով նա ներկայացրեց քաղաքական պրոցեսներին մասնակցելու հայտ, որը հնարավոր է իրագործել և՛ առաջին դեմքով, և՛ քողարկված՝ թիմի ռեսուրսներն օգտագործելով՝ այլ առաջնորդով»:
Բագրատյանի դիտարկմամբ՝ Սերժ Սարգսյանը որոշել է այս պահին խոսել, քանի որ համարում է, որ կրքերը հանդարտվել են և իր ձայնը լսելի կլինի, իսկ էյֆորիկ մթնոլորտում չէր կարող լսարան ունենալ:
«Սերժ Սարգսյանը և իր թիմը փորձում են դիրքավորվել քաղաքական դաշտում և երկխոսություն սկսել ՀՀԿ-ի և հանրության այն հատվածի միջև, որը ինչ-որ ժամանակ եղել է ՀՀԿ-ի հենարանը»,- նշեց Բագրատյանը՝ հավելելով, որ սա, թերևս, վերակենդանացման փորձ էր»:
Կարեն Սիմոնյանի դիտարկմամբ՝ հատուկ քաղաքական պրոցեսներ են ընթանում, և վաղ թե ուշ Սերժ Սարգսյանը պետք է խոսեր: «Պրոցեսները նաև Արցախի շուրջ են ընթանում, և իշխանություններն այնքան էլ ազնիվ չեն ժողովրդի հետ, և միգուցե այնպիսի գործընթացներ են ուզում տանել, որոնց մասին տեղյակ է երրրորդ նախագահը, և միգուցե նրա միջամտությունն ու հարցերի բարձրաձայնումը դրանով է պայմանավորված: Այս հարցազրույցի հասեատերը, որպես կապիտուլանտ, վարչապետն է, և նա պետք է պատասխանի Ս. Սարգսյանի հարցադրումներին»:
Մանրամասները՝ տեսանյութում: