Իրանը պատրաստվում է Եվրասիական տնտեսական միության մշտական անդամ դառնալ, հայտարարել է Իսլամական Հանրապետության Մեջլիսի խոսնակ Մոհամադ Բաղեր Ղալիբաֆը.«Իրանը բանակցություններ է սկսել միության մշտական անդամ դառնալու ուղղությամբ, և մեր մշտական անդամակցության նախապատրաստական աշխատանքները կավարտվեն առաջիկա երկու շաբաթվա ընթացքում»,- չորեքշաբթի Մոսկվա կատարած եռօրյա այցից հետո Թեհրան ժամանելով՝ իրանական լրատվամիջոցներին ասել է պաշտոնյան։
2015 թվականից գործող տնտեսական միությունը, որի անդամը նաև Հայաստանն է, 5 երկիր է միավորում։ Միության անդամներն են նաև Բելառուսը, Ղազախստանը, Ղրղզստանը և Ռուսաստանը։ ԵԱՏՄ անդամ միակ երկիրը, որը ցամաքային սահման ունի Իրանի հետ, Հայաստանն է։
Նշենք նաև, որ 2018 թվականի մայիսին Եվրասիական տնտեսական միությունը և Իրանը համաձայնագիր ստորագրեցին, որով ԵԱՏՄ անդամ երկրների և Իրանի միջև արտահանված ապրանքների մաքսատուրքերը ժամանակավորապես իջեցվում կամ վերացվում էին սահմանափակ քանակով ապրանքների համար։ 2019 թվականի հոկտեմբերից ուժի մեջ մտած գործարքը նախատեսված էր երեք տարի ժամանակով, որի ընթացքում միությունը և Իրանը պետք է համաձայնություն ձեռք բերեին առևտրի ազատ գոտու ռեժիմի անցման վերաբերյալ։
Իրանագետ, ՄԱՀՀի ասոցացված փորձագետ Էմմա Բեգիջանյանի կարծիքով՝ Իրանի անդամակցությունը ԵԱՏՄ-ին Հայաստանի համար ձեռնտու է. «Պարզապես ես նման նախաձեռնությունը տեսնում եմ այն կոնտեքստում, որ աշխարհը հնարավոր է դառնում երկբևեռ՝ Չինաստանի ու ԱՄՆ-ի շուրջ։ Գուցե Իրանը նման եզրակացության է հանգել ու դրա համար էլ ցանկանում է դառնալ ԵԱՏՄ հիմնական անդամ և չունենալ այն դիտորդի կարգավիճակը, որ հիմա կա։ Իհարկե սա ընդամենը հայտարարություն է։ Պետք է հետևենք զարգացումներին, տեսնենք ինչ դիրքորոշում է ունենալու ԱՄՆ-ն, կվերադառնա՞ համաձայնագրին, թե ոչ։ՄԱԿ-ի առաջին քարտուղարը ևս հայտարարել է, որ աշխարհի երկբևեռվածության վտանգ է տեսնում ու ես ավելի շատ այս մտադրությունը այս համատեքստում եմ դիտում»,-«Առաջին լրատվական»-ի հետ զրույցում ասաց նա։
Միևնույն ժամանակ Բեգիջանյանը չբացառեց, որ Իրանը նման որոշման է հանգել Իրանի ԱԳ նախարար Զարիֆի՝ ՌԴ-ում ունեցած քննարկումներից հետո. «Բոլոր դեպքերում մեզ համար սա լավ է։ Բայց նաև հիմք է տալիս ենթադրելու, որ շուտով նման պատրաստակամություն կհայտնի նաև Ադրբեջանը։ Չեմ բացառում, որ Իրանը նաև սա է հաշվի առնում։ Ինձ թվում է նաև այս հարցն է քննարկվում։ Մի բան էլ պետք է հաշվի առնենք։ Իրանում հունիսին նախագահական ընտրություններ են։ Պահպանողականները նշում են, որ եթե ԱՄՆ-ն մինչ այդ չվերադառնա համաձայնագրին, ապա վերանորոգիչների ընտրվելու շանսերը շատ քիչ են»։
Մեր այն դիտարկմանը,որ եթե Իրանը դառնա ԵԱՏՄ անդամ, կարո՞ղ ենք նշել, որ Հայաստանը այդ ակումբում բարեկամ է ձեռք բերում, Էմմա Բեգիջանյանն արձագանքեց. «Կարծում եմ՝ մեծ տարբերություն չի լինի։ Անգամ այս դեպքում Իրանի ու Հայաստանի շահերը համընկնում են։ Գուցե աջակցություն լինի Հայաստանի ինքնուրույնության պահպանման հարցում։ Բայց կան նաև Իրանի ավելի խոշոր ու մարտավարական շահեր։ Այդ դեպքերում գուցե ստորադասվեն Հայաստանի հետ ընդհանուր շահերը։ Ամեն դեպքում՝ սա լավ է, հատկապես եթե աշխարհը լինելու է երկբևեռ։ Պարզ է, որ մենք ոչ մի բևեռի շանս չունենք»։