Աբխազիայի հայ համայնքը որոշում է կայացրել միանալ շտաբին՝ ի պաշտպանություն Ռուսաստանի նախագահ Վլադիմիր Պուտինի: Այս մասին հաղորդում է Աբխազիայի ռուսական համայնքի կայքը:
Նախորդ օրը Սուխումիում համայնքների ներկայացուցիչների հանդիպում տեղի ունեցավ: Մամուլի հաղորդագրության մեջ նշվում է, որ փետրվարի 9-ը «մարշալ Իվան Բաղրամյանի անվան հայկական գումարտակի հիմնադրման օրն է»:
Հայ համայնքի ղեկավար Գալուստ Տրապիզոնյանը հայտարարել է, որ «Աբխազիայի համար Ռուսաստանը և՛ հարևան է, և՛ ռազմավարական գործընկեր, և մեր ժողովուրդները կապված են սերտ բարեկամական կապերով»:
Փետրվարի 1-ին Սուխումիում բացվեց Վլադիմիր Պուտինին աջակցող հասարակական շտաբ: Այն տեղակայված է Աբխազիայի Սևծովյան կազակական բանակի և Աբխազիայի ռուսական համայնքի գրասենյակում: Շտաբում ընդգրկված են տարբեր հասարակական կազմակերպությունների ակտիվիստներ:
Հարկ է նշել, որ Պուտինին սատարելու Սուխումիի ցույցը, որը նշանակված էր հունվարի 23-ին, հետաձգվել է «մինչև համաճարակաբանական իրավիճակի կայունացումը»:
