Աղդամում հանդիսավորապես բացվեց արցախյան գոտում հրադադարի մոնիտորինգի ռուս-թուրքական կենտրոնը, որտեղ գործելու են յուրաքանչյուր կողմից 60-ական զինվորական և վերահսկելու են հրադադարի ռեժիմը: Ըստ տեղեկության, դրա համար կիրառվելու են նաև հետախուզական ԱԹՍ-ներ: Մոնիտորինգի կենտրոնի առկայությունը անշուշտ ռազմական կամ տեխնիկական չէ, այլ ռազմա-քաղաքական: Դա յուրօրինակ ձևաչափ է, որով ամրագրված է Թուրքիայի դերն արցախյան հարցում: Եթե թուրքերը ստացել են հրադադարի մոնիտորինգի այսպես ասած լեգիտիմ իրավունք, ապա դա նշանակում է, որ նրանք ներգրավվել են արցախյան գործընթաց: Այդ ներգրավումը միջնորդական չէ և այդ հանգամանքը չլինելով անշուշտ վճռորոշ, այդուհանդերձ նաև կարող է լինել էական: Դա կախված է այն հանգամանքից, թե մոնիտորինգի կենտրոնին ինչպես կվերաբերեն Մինսկի խմբի մյուս երկու համանախագահ ԱՄՆ-ն ու Ֆրանսիան:
Միջնորդական շարունակում է մնալ բացառապես այդ ձևաչափը, որը սակայն ներկայումս գտնվում է պասիվ փուլում: Ձեռնարկվում է աշխատանք այն աշխուժացնելու համար: Լեհաստանում նախորդ շաբաթ այդ թեմայով հանդիպել էին Մինսկի խմբի երեք համանախագահները, որոնք առաջիկայում կարող են այցելել ռեգիոն: ՌԴ ԱԳՆ խոսնակ Մարիա Զախարովան հայտարարեց, որ ծրագրված է նաև Արցախ այց, որը ճշտվում է կողմերի հետ: Այդ ամենով հանդերձ, ինչպե՞ս են վերաբերելու Միացյալ Նահանգներն ու Ֆրանսիան հրադադարի ռուս-թուրքական մոնիտորինգին: Այսպես ասած ճանաչելու՞ են դրա լիազորությունը, թե՞ Վաշինգտոնն ու Փարիզը կասկածի տակ են դնելու դրա լեգիտիմությունն ու առաջարկելու են հրադադարի ռեժիմի պահպանման մոնիտորինգի և քննության այնպիսի մեխանիզմներ, որոնցում ներկա են նաև իրենք: Կամ, Վաշինգտոնն ու Փարիզը կդնե՞ն այդ մոնիտորինգի կենտրոնի մասնակցության ընդլայնման հարց, մասնավորապես առաջ քաշելով իրենց զինվորականների կամ մասնագետների ներգրավվածության խնդիր: Թեև այդ դեպքում էլ Անկարան կարող է դնել Մինսկի համանախագահությունում իր ընդգրկման հարցը:
Միևնույն ժամանակ, կարող է առաջ գալ մոնիտորինգի կենտրոնը որոշակիորեն Մինսկի խմբի համանախագահությանը ենթարկեցնելու հարց: Այլ կերպ ասած, Մինսկի խմբի համանախագահությունը մոնիտորինգի ենթարկի ռուս-թուրքական մոնիտորինգը: Ընդ որում, դրան գուցե շատ չդիմադրի նաև Ռուսաստանը, հաշվի առնելով, որ Մոսկվան Թուրքիայի համեմատ կստանա առավելություն Մինսկի խմբի համանախագահության ձևաչափում լինելու բերումով: ԱՄՆ ու Ֆրանսիան նոյեմբերի 9-ից հետո հայտարարել են, թե համանախագահ գործընկեր Ռուսաստանին հարց ունեն Թուրքիայի դերի առնչությամբ: Այժմ սակայն նրանք դեռևս լուռ են այդ դերի այսպես ասած ֆորմալացման գործընթացի առումով:
