«Արցախի կարգավիճակը, որպես չճանաչված պետություն, ճանաչվել է՝ նաև այդ հայտարարության մեջ: Միջազգային ճանաչումը ոչ միայն իրավական և բարոյական կատեգորիա է, այլ նաև աշխարհաքաղաքական, և մեր պարագայում աշխարհաքաղաքական մոտեցումները գերակշռում են: Դա է պատճառը, որ մենք արդեն 3 տասնամյակ է՝ պայքարում ենք ճանաչման համար, բայց դեռևս չենք հասել դե յուրե ճանաչման: Այդ առումով մեզ սպասվում է քրտնաջան և ժամանակատար աշխատանք»,- «Առաջին լրատվական»-ի հետ զրույցում ասաց Արցախի արտգործնախարար Դավիթ Բաբայանը՝ անդրադառնալով ՌԴ ԱԳ նախարար Լավրովի վերջին հայտարարության մեջ Արցախի կարգավիճակին առնչվող հարցին:
Նրա խոսքով՝ ոչ պակաս կարևոր է Արցախի սուբյեկտայնության պահպանումը, աշխարհաքաղաքական գործոնի և ազդեցության պահպանումը. «Մի բան է, եթե Արցախը, որպես հայկական միավորում, որպես նույնիսկ չճանաչված երկիր, գոյություն ունի, մեկ այլ բան է, երբ Անդրկովկասում չլինի Արցախ պետություն, Արցախ հայկական միավորում»:
Դավիթ Բաբայանն ընդգծեց. «Մենք պետք է ապաքինվենք և որպես աշխարհաքաղաքական գործոն՝ լինենք: Սա բարդ գործընթաց է, բայց հնարավոր է»:
Արցախի ԱԳ նախարարը շատ զգայուն հարց է համարում գերիների թեման. «Ադրբեջանը բացեիբաց խախտում է միջազգային բոլոր նորմերը, կոնվենցիաները: Արցախի ԱԳՆ-ն մի շարք նամակներով դիմել է միջազգային համապատասխան ատյաններին: Սա ամենակարևոր հարցերից մեկն է, որ կանգնած է մեր պետության առջև»:
Մանրամասն՝ տեսանյութում:
