Պատերազմի ամբողջ ընթացքում և դրա ավարտից մինչ օրս Սահմանադրական բարեփոխումների մասնագիտական հանձնաժողովը ոչ մի նիստ չի գումարել, որևէ քննարկում տեղի չի ունեցել։ Այդ մասին «Առաջին լրատվական»-ի հետ զրույցում ասաց մասնագիտական հանձնաժողովում ՀԿ սեկտորի ներկայացուցիչ Դանիել Իոաննիսյանը։ «Վերջին նիստը պատերազմից առաջ է եղել։ Պատերազմի ընթացքում բոլորը զբաղված էին, հիմա էլ շատերը մտածում են, որ դրա ժամանակը չի»,- ասաց Իոաննիսյանը՝ հավելելով, որ անվիճելի է, որ հիմա ավելի կարևոր հարցեր կան, բայց մեծ խնդիրներ ունենալը չի նշանակում, որ մնացած հարցերը պետք է անկարևոր դարձնել։ «Բայց դա նույնն է, որ մաքրուհին ասի՝ երկրում լուրջ խնդիրներ կան, մաքրության ժամանակը չի։ Ամեն մի մասնագիտության տեր մարդ, որ ասի, թե իր գործի ժամանակը չի, ավելի կարևոր հարցեր կան, տենց չի լինի։ Այո, տարածքային կորուստներ ունենք, զոհեր ունենք, գերիների առաջնահերթ հարց ունենք, բայց դա չի նշանակում, որ մնացած հարցերը պետք է երկրորդվեն կամ առհասարակ անտեսվեն»,- ասաց մեր զրուցակիցը։
Մեր հարցին՝ պնդելո՞ւ է, որ մասնագիտական հանձնաժողովը նիստեր հրավիրի, ավարտին հասցնի աշխատանքները, Իոաննիսյանը պատասխանեց. «Ես հիմա էլ եմ պնդում, բայց ես այս հարցում փոքրամասնություն եմ»։
Սահմանադրական բարեփոխումների մասնագիտական հանձնաժողովի ընդդիմադիր «Լուսավոր Հայաստան» խմբակցության անդամ Տարոն Սիմոնյանը «Առաջին լրատվական»-ի հետ զրույցում ասաց, որ ինքը հրաժարվել է մասնակցել մասնագիտական հանձնաժողովի նիստերին, քանի որ ներկայումս սահմանադրական բարեփոխումները արդիական հարց չի համարում։ «Ես հրաժարվել եմ մասնակցել նիստերին, քանի որ դա հիմա արդիական խնդիր չի։ Եթե նիստեր էլ գումարվեն, ես չեմ մասնակցելու»,- ասաց Սիմոնյանը։
Հիշեցնենք, որ տևական ժամանակ է՝ հանձնաժողովի նիստերին չի մասնակցում նաև ԱԺ մյուս ընդդիմադիր՝ ԲՀԿ խմբակցության ներկայացուցիչ Գևորգ Պետրոսյանը։
«Առաջին լրատվական»-ը Սահմանադրական բարեփոխումների մասնագիտական հանձնաժողովի նախագահ Եղիշե Կիրակոսյանից փորձեց պարզել՝ հանձնաժողովի աշխատանքները ավարտին հասցվելո՞ւ են, թե՞ ոչ։ Կիրակոսյանը, սակայն, հրաժարվեց պատասխանել մեր հարցերին։
Հանձնաժողովի իշխանական ներկայացուցիչ, պատգամավոր Վահագն Հովակիմյանն էլ մեզ հետ զրույցում ասաց, որ իրավասու չէ հանձնաժողովի ճակատագրի վերաբերյալ մեկնաբանություններ անել, հարցերի պատասխանել և հորդորեց հանձնաժողովի հետագա գործունեության հետ կապված հարցերն ուղղել հանձնաժողովի նախագահ Եղիշե Կիրակոսյանին։ «Հանձնաժողովի ճակատագրի, աշխատանքների, կազմակերպչական հարցերի վերաբերյալ բոլոր հարցերին իրավասու է պատասխանել միայն հանձնաժողովի նախագահը»,- ասաց Հովակիմյանը։
Մեր հարցին՝ ինքը, որպես իշխանական պատգամավոր, կարևորո՞ւմ է անգամ այս փուլում սահմանադրական բարեփոխումների աշխատանքները ավարտին հասցնելը, Հովակիմյանը պատասխանեց. «Իհարկե, կարևորում ենք։ Սահմանադրական բարեփոխումները մեր երկրին օդ ու ջրի պես պետք են՝ նաև հաշվի առնելով այն իրողությունները, որոնց միջով անցել ենք։ Սահմանադրական բարեփոխումները շատ կարևոր են մեզ համար»։
Հիշեցնենք, որ Սահմանադրական բարեփոխումների մասնագիտական հանձնաժողովը դեռևս անցած տարվա հոկտեմբերի վերջին պետք է ներկայացներ սահմանադրական փոփոխությունների հայեցակարգը։ Այդ ժամկետը մեկ անգամ արդեն երկարացվել էր, սակայն պատերազմական իրավիճակով պայմանավորված՝ հայեցակարգը այդպես էլ չներկայացվեց։ Հիմա առհասարակ հանձնաժողովի հետագա գոյությունն է կասկածի տակ։
