Իրանը Ռուսաստանի, Չինաստանի և Հնդկաստանի հետ բանակցություններ է անցկացրել կորոնավիրուսի դեմ պատվաստանյութերի շուրջ: Այդ մասին հայտնել է Իսլամական պետության կառավարության պաշտոնական ներկայացուցիչ Ալի Ռաբիին: Նրա խոսքով՝ Իրանի իշխանությունների նպատակն անվտանգ պատվաստանյութ ստանալն է: «Մենք (ԱՀԿ-ի նախաձեռնությամբ) 16,8 մլն չափաբաժին ենք ստացել COVAX-ի գծով: Բացի այդ, մենք Ռուսաստանի, Չինաստանի և Հնդկաստանի հետ բանակցություններ ենք վարել (պատվաստանյութի) ձեռքբերման և օպերատիվ փոխադրման շուրջ: Մենք միանգամայն պարզորոշ կերպով զբաղվում ենք այդ երկրներից պատվաստանյութերի գնման հարցով»,-ասել է Ռաբիին՝ ելույթ ունենալով ճեպազրույցի ընթացքում:
Ներկայում Իրանը պատվաստանյութ չունի կորոնավիրուսի դեմ: Այդուհանդերձ, երկրում իրականացվում են պատրաստուկների սեփական մշակումներ: «Կովո-Իրան» առաջին պատվաստանյութն արդեն ներարկվել է կամավորներին: Նաեւ քննարկվում է այլ երկրներից, բացի Մեծ Բրիտանիայից ու ԱՄՆ-ից, պատվաստանյութեր գնելու հարցը, ուժի մեջ է Իրանի գերագույն առաջնորդ Ալի Խամենեիի արգելքը: Թեհրանում կորոնավիրուսի դեմ պատվաստանյութի շուրջ համագործակցության որպես հնարավոր ուղղություններ նշել են Ռուսաստանը, Չինաստանը, Հնդկաստանը և վերջին ժամանակներս՝ Կուբան, որի հետ Իրանը համատեղ մշակումներ է կատարում: Ինչ վերաբերում է ռուսաստանյան «Սպուտնիկ V» պատվաստանյութին, ապա 2020 թվականի վերջին Իրանի առողջապահության նախարարությունում հաղորդել են, որ Թեհրանը կորոնավիրուսի դեմ ռուսաստանյան պատվաստանյութերը նկատի կունենա արտասահմանից COVID-19-ի դեմ պատրաստուկների գնման հարցը լուծելիս:
