8,7 բալ ուժգնությամբ երկրաշարժ է տեղի ունեցել Մոնղոլիայի և Ռուսաստանի սահմանին: Այդ մասին հաղորդել է արտակարգ իրավիճակների նախարարության Իրկուտսկի մարզի վարչությունը։
Ստորգետնյա ցնցումները գրանցվել են Երևանի ժամանակով 01:32-ին: Էպիկենտրոնը գտնվում է Մոնղոլիայի Տուրտ բնակավայրից 34 կիլոմետր հեռավորության վրա: Եվրոպա-Միջերկրածովյան սեյսմոլոգիական կենտրոնը (EMSC) երկրաշարժի մագնիտուդը գնահատում Է 6,5: Նրա տվյալներով՝ երկրաշարժի Էպիկենտրոնը գտնվում է Անգարսկից 277 կիլոմետր դեպի հարավ-արևմուտք: Օջախն ընկած Է տասը կիլոմետր խորության վրա: Միևնույն ժամանակ ԱՄՆ-ի Երկրաբանական ծառայությունը (USGS) հաղորդում Է 6,8 մագնիտուդի մասին:
ԱԻՆ-ի տվյալներով, Իրկուտսկի մարզում զգացվել են չորս-հինգ բալ ուժգնությամբ ստորգետնյա ցնցումներ, ինչպես նաև չորս հետցնցումներ: Բուն Իրկուտսկում գրանցվել են մինչև հինգ բալ ինտենսիվությամբ ցնցումներ:
Տարածաշրջանում հնարավոր զոհերի ու ավերածությունների մասին տեղեկատվություն չի ստացվել: Իրկուտսկի մարզի նահանգապետ Իգոր Կոբզևը Instagram-ին հայտնել է, որ իշխանությունները զննում են տները և սոցիալական օբյեկտները, հունվարի 12-ին պլանավորվում է անցկացնել արտակարգ իրավիճակների տարածաշրջանային հանձնաժողովի նիստ:
Հենց Իրկուտսկում, տեղի իշխանությունների տվյալներով, ավերածություններ չկան, բոլոր օբյեկտներն աշխատում են հաստիքային ռեժիմով: Մինչև երեք բալ ուժգնությամբ հետցնցումներ են զգացվել նաև Կրասնոյարսկի երկրամասում: Տեղի բնակիչները սոցիալական ցանցերում գրում են այն մասին, որ օրորվել են իրենց տան ջահերը, տեղաշարժվել են մահճակալները, իսկ ոմանք նշել են, որ իրենց մոտ ցնցումներից առաջ կաղկանձում էին շները: Կրասնոյարսկի քաղաքապետարանում հաղորդել են, որ երկրաշարժից հետո տուժածներ ու ավերածություններ չկան, հաղորդել Է ՌԻԱ Նովոստին:
