Ներքաղաքական կրքեր են բորբոքվում՝ կապված վարչապետ Նիկոլ Փաշինյանի՝ մոսկովյան հնարավոր այցի հետ: Որքանո՞վ են դրանք հիմնավոր: «Առաջին լրատվական»-ի հետ զրույցում անդրադառնալով այս հարցին՝ Գերագույն խորհրդի նախկին պատգամավոր Ազատ Արշակյանը նկատեց, որ պաշտոնական ինֆորմացիա չկա, թե ինչ օրակարգ է նախատեսվում: «Միայն մենք չենք, որ անտեղյակ ենք, երևի վարչապետն՝ ինքն էլ չգիտի, թե ինչ քաղաքական օրակարգ կա, այ դա անհանգստացնող է»,- նշեց Արշակյանը՝ հավելելով՝ մեզ հավանաբար հրավիրում են մութ սենյակ, որտեղ չգիտենք, թե ինչը որտեղ է դրված:
«Հանուն Հանրապետության» կուսակցության անդամ Արտաշես Խալաթյանը հավելեց, որ նոյեմբերի 9-ի հայտարարությունը իրավաբանորեն խոցելի է, քաղաքականապես բազմաթիվ հարցեր է առաջացնում, և հիմա հնարավոր է, որ փորձ է արվում միս ու արյուն տալ այդ հայտարարությանը:
«Սա մեզ համար պատուհան է վերաբանակցելու կամ վերախմբագրելու այն կետերը, որոնք որոշակի չեն, և փորձել դրանք հարմարեցնել մեր շահերին: Մտահոգիչ է այն, որ բավականին հեղհեղուկ ինֆորմացիա է հաղորդվում հանրությանը. լրատվական սպրդումների արդյունքում հանրային կարծիք ձևավորվեց, որ լինելու է եռակողմ հանդիպում, բայց թե ինչ ձևաչափով հանդիպում է լինելու, ոչ ոք չգիտի, և դա ոչ միայն հայկական կողմի անտեղյակությամբ է պայմանավորված, այլ նաև նրանով, որ դեռևս ռուսական կողմն էլ հստակ չի կողմնորոշվել, թե ինչի շուրջ պետք է կազմակերպի բանակցությունները»,- նշեց Խալաթյանը: Նրա կարծիքով՝ ռուս-թուրքական համագործակցության շրջանակներում է որոշվել նախաձեռնել այս հանդիպումը:
«Փորձ է արվում նոյեմբերի 9-ի հայտարարարության յուրքանչյուր կետ առանձին քննարկել և վիժեցնել ռազմագերիների վերադարձի պարտավորվածությունը: Իսկ ռուսական կողմից անկողմանակալություն չի դրսևորվում»,- նշեց Խալաթյանը:
Անդրադառնալով մոսկովյան այցի առնչությամբ վարչապետի հայտարարությանը և պարզաբանումներին՝ «Ժառանգություն» կուսակցության քաղաքական վարչության նախագահ Նարինե Դիլբարյանն ընդգծեց, որ այդ պարզաբանումները բազմաթիվ նոր հարցեր առաջացրին:
«Այս իրավիճակը լուրջ տագնապներ է առաջացնում. եռակողմ հանդիպման մասին ոչ միայն հայկական, այլ նաև ռուսական մամուլն է խոսում, սովորաբար ծուխն առանց կրակի չի լինում: Պետք է անկեղծ մթնոլորտ լինի, բացատրվի, թե ինչ հարցեր են քննարկվելու, հանդիպումից առաջ պետք է քաղաքական քննարկումներ լինեն»,- նշեց Դիլբարյանը:
Ազատ Արշակյանն ընդգծեց, որ Նիկոլ Փաշինյանը չպետք է գնա Մոսկվա. «Գնալ բանակցությունների հաղթող կողմի հետ, կնշանակի հանձնվել, մենք արդեն հանձնվել ենք, ինչու ենք գնալու՝ էլի ինչ-որ բան հանձնելու համար, որովհետև մեզանից միայն պահանջում են, թուրքական վիլայեթի ծրագիր է պլանավորվել: Նիկոլ Փաշինյանը պետք է դիմի Մինսկի խմբի համանախագահներին, որովհետև Արցախի հարցը միայն Արցախի հարց չէ»:
Մանրամասն՝ տեսանյութում: