ԱՄՆ Կոնգրեսը հաստատել է նախագահական ընտրություններում Ջո Բայդենի հաղթանակը։ Իսկ մինչև այդ Կոնգրեսը հարձակման է ենթարկվել ընտրություններում փաստացի պարտված Դոնալդ Թրամփի կողմնակիցների կողմից։ Ցուցարարները կոտրել են Կոնգրեսի շենքի ապակիները և ներխուժել շենք: Կապիտոլիումում անկարգությունների ժամանակ 4 մարդ է մահացել: Մեկ կնոջ գնդակահարել են ոստիկանները, եւս երեքը մահացել են «բժշկական բնույթի արտակարգ իրավիճակի հետեւանքով»: Փոխնախագահ Մայք Փենսը, Սենատի մեծամասնության ղեկավար Միթչ Մաքքոնելը և մի քանի այլ օրենսդիրներ անմիջապես տարհանվել են շենքից: Ականատեսների վկայությամբ ՝ ցուցարարները, ներխուժելով Կոնգրես, հնչեցնում էին Թրամփին սատարող կարգախոսներ ու ծածանում ամերիկյան դրոշներ: Բախումների ժամանակ Կոնգրեսի շենքում ոստիկանությոնը կիրառել է արցունքաբեր գազ:
Արդյունքում, ոստիկանությանը հաջողվել է դուրս բերել ցուցարարներին Սենատի նիստերի դահլիճից: Նախագահ Դոնալդ Թրամփը Twitter-ով դիմել է իր աջակիցներին՝ խնդրելով նրանց «լինել խաղաղ» և չբախվել իրավապահների հետ: Այնուհետև նա հանդես է եկել կարճատև տեսաուղերձով՝ ուղղված իր կողմնակիցներին, ուր կրկին շեշտել է, որ ընտրությունները կեղծված են և գողացված իրենից և իր աջակիցներից: Տեսաուղերձով հանդես է եկել նաև նորընտիր նախագահ Ջո Բայդենը, ով տեղի ունեցածը որակել է ՛՛հարձակում ամերիկյան ժողովրդավարության դեմ՛՛, իսկ անկարգույթունների մասնակիցներին՝ անօրինականությամբ զբաղվող ՛՛էքստրիմիստներ՛՛: Ներկայացուցիչների պալատի մի քանի անդամներ թվիթերում գրել են, որ ստիպված են թաքնվել իրենց գրասենյակներում, իսկ Վաշինգտոնի քաղաքապետը Կոլումբիայի շրջանում հայտարարել է պարետային ժամ։ Twitter սոցկայքը հայտարարել է, որ առնվազն տասներկու ժամով արգելափակում է ԱՄՆ նախագահ Դոնալդ Թրամփի էջը: Facebook-ը հեռացրել է Թրամփի՝ աջակիցներին ուղղված տեսաուղերձը։ Թեմայի շուրջ «Առաջին լրատվական»-ը զրուցել է ԱՄՆ-ում լույս տեսնող «Կալիֆորնիա Կուրիեր» թերթի հրատարակիչ և խմբագիր Հարութ Սասունյանի հետ:
