Ադրբեջանական APA լրատվական գործակալության փոխանցմամբ՝ Թուրքիան լուրջ չի ընդունում Հայաստանի նախագահ Սերժ Սարգսյանի ծաղկաձորյան հայտարարությունը։ Այս մասին հայտարարել է Ադրբեջանում Թուրքիայի դեսպան Հուլուսի Քըլըչը.
«Ամեն ոք կարող է պնդումներ ունենալ։ Մեր վարչապետը պատասխանել է այդ խնդրին։ Ես չեմ ցանկանում այդ խնդրի շուրջ որևէ կերպ պատասխանել Հայաստանի նախագահին։ Մենք դա լուրջ չենք ընդունում։ Անկարան անում է ամեն հնարավոր բան՝ հարևան երկրների հետ խնդիրներ չունենալու համար»։
Հուլուսի Քըլըչը նաև մեկնաբանել է մի շարք կազմակերպությունների տվյալները, ըստ որոնց՝ Հայաստանի ու Թուրքիայի միջև տարեկան ապրանքաշրջանառության ծավալը կազմում է 250 միլիոն դոլար.
«Թուրքիայի ու Հայաստանի միջև գոյություն չունեն ո՛չ դիվանագիտական, ո՛չ էլ առևտրային հարաբերություններ։ Նայելով ադրբեջանական շուկային՝ մենք տեսնում ենք, որ այստեղ հասնում է աշխարհի բոլոր երկրների արտադրանքը։
Դրան պետք է այլ կերպ վերաբերել։ Պաշտոնապես առևտուր չի իրականացվում Թուրքիայի ու Հայաստանի միջև։ Սակայն մեր արտադրանքը Հայաստան կարող է հասնել այլ երկրների միջոցով»։