COVID-19-ի դեմ Ռոսպոտրեբնադզորի «Վեկտոր» գիտական կենտրոնի «էպիՎակԿորոնա» պատվաստանյութի փաստաթղթերն ուղարկվել են Առողջապահության համաշխարհային կազմակերպություն (ԱՀԿ): Այդ մասին հաղորդել է գլխավոր բժիշկ-համաճարակաբան Աննա Պոպովան:
«Դեկտեմբերի 8-ին ԱՀԿ է ուղարկվել ռուսաստանյան ևս մեկ՝ «ԷպիՎակԿորոնա» պատվաստանյութի փաստաթղթերը, և սպասում ենք ԱՀԿ-ի որոշմանը»,- ասել է Պոպովան՝ հանդես գալով դեկտեմբերի 9-ին կայացած Միջազգային գիտա-գործնական խորհրդաժողովում, որը նվիրված էր նոր կորոնավիրուսային վարակի և մյուս վարակիչ հիվանդությունների հակազդման հարցերին:
Պոպովայի խոսքով՝ միջազգային համագործակցությունը սկսվել է դեռ այս տարվա հունվարին, երբ Ռոսպոտրեբնադզորի «Վեկտոր» գիտական կենտրոնն ընդգրկվել է եվրոպական լաբորատորիաների ռեեստրում, որոնք ԱՀԿ-ին աջակցում են COVID-19-ի ախտորոշմանը: Ներկայում «ԷպիՎակԿորոնա»-ն անցնում է կլինիկական փորձարկումների երրորդ փուլը:
Կորոնավիրուսի դեմ առաջին ռուսաստանյան պատվաստանյութը «Սպուտնիկ V»-ն է, որը մշակվել է Գամալեյայի անվան համաճարակաբանության և մանրէաբանության ազգային հետազոտական կենտրոնում՝ Ռուսաստանի ուղղակի ներդրումների հիմնադրամի հետ համատեղ: Այն ստեղծվել է մարդու ադենովիրուսային վեկտորների բազայի վրա և ստացել է «Սպուտնիկ V» անունը: Այն հաջողությամբ անցել է փորձարկումների բոլոր փուլերը:
Աշխարհի շուրջ 50 երկիր Ռուսաստանից պատվիրել է այս պատվաստանյութի 1,2 մլրդ չափաբաժին: Ռուսաստանյան երկրորդ՝ «ԷպիՎակԿորոնա» պատվաստանյութը, գրանցվել է հոկտեմբերի 14-ին: Նոյեմբերին սկսվել է դեղամիջոցի հետգրանցումային հետազոտությունները 60-ից բարձր տարիքի 150 և 18-ից բարձր տարիքի 3 հազար կամավորների վրա:
Պատվաստանյութի զանգվածային արտադրությունը պլանավորված է 2021 թվականի սկզբին: Ռուսաստանի Գիտությունների ակադեմիայի Չումակովի անվան կենտրոնը մշակել է COVID-19-ի դեմ իր պատվաստանյութը: Այս պատրաստուկը նույնպես կլինիկական փորձարկումների փուլ է անցնում, որին մասնակցում են 300 կամավոր: Ինչպես սպասվում է, պատվաստանյութը գրանցում կարող է ստանալ մինչև տարեվերջ, հաղորդել է «Ինտերֆաքս»-ը:
