Համավարակի և պատերազմի հետևանքով տնտեսությունը հայտնվել է բավականին ծանր իրավիճակում՝ մասնագետները 7-8 տոկոս տնտեսական անկում են նախատեսում։
Ի՞նչ պետք է անել տնտեսության դիմադրողականությունը բարձրացնելու և ռիսկերը մեղմելու համար․ «Առաջին լրատվական»-ի հարցին ԱԺ նախկին պատգամավոր Վարազդատ Կարապետյանը պատասխանեց․ «Իրականում իրավիճակն անցնող տարվա ընթացքում բավականաչափ բարդ է եղել տնտեսական առումով։ Այժմ պետք են հրատապ, առաջնային միջոցառումներ, որպեսզի կարողանանք արագ հաղթահարել այս ճգնաժամը։ Առաջին հերթին անհրաժեշտություն կա մեծամասշտաբ ներդրումների։ Այդ ներդրումները պետք է արվեն և՛ պետության կողմից, և՛ մասնավոր հատվածի կողմից։ Այսինքն՝ պետությունն իր կապիտալ ծախսերը, իր պետական գնումները պետք է աճեցնի, որպեսզի կարողանա դրա միջոցով խրախուսել տնտեսության զարգացումը, բայց, միևնույն ժամանակ, պետք է ստեղծի բավարար պայմաններ, նախադրյալներ, որպեսզի մասնավոր հատվածը նույնպես ներդրումներ անի։ Այն կանխավարկածը, որ գումարներ չկա ներդրում անելու, պետք է դնենք մի կողմ։ Խնդիրն այն է, որ մարդկանց սպասելիքները, ակնկալիքները բացասական են դարձել, և մարդիկ հակված չեն ներդրումներ անելու՝ ոչ ներսում, ոչ էլ դրսից եկող մարդիկ հակված չեն ներդրումներ անելու։ Դրա համար առաջին հերթին պետք է երկրում քաղաքական կայունության վիճակ ապահովել, որը հնարավորություն կտա, որ մարդկանց մոտ ապագայի լավատեսական սպասումները սկսեն աճել, և մարդիկ սկսեն գումարներ ներդնել տնտեսության մեջ»։
Ե՞րբ հնարավոր կլինի ներդրումներ ակնկալել։ Դա ամիսների՞ հարց է, թե՞ տարվա կամ տարիների․ «Առաջին լրատվական»-ի հարցին Վարազդատ Կարապետյանը պատասխանեց․ «Որպեսզի ներդրումներ լինեն, առաջին նախապայմանը քաղաքական կայունությունն է և կանխատեսելիությունը։ Այսինքն՝ ներդրողի համար կարևոր նախապայման է, որպեսզի այն միջավայրը, որտեղ մարդը պետք է ներդրում անի, մաքսիմալ կանխատեսելի լինի։ Քանի դեռ կա այս քաղաքական անկայունությունը, մենք ներդրումների հոսք չենք ունենալու՝ ոչ ներքին խնայողությունները կդառնան ներդրում, ոչ էլ դրսից ներդրումներ կգան։ Դրա համար հիմա ամենակարևոր խնդիրը քաղաքական կայունություն ապահովելն է»։
Մանրամասները՝ տեսանյութում։
