Անցած 24 ժամվա ընթացքում Վրաստանում գրանցվել է կորոնավիրուսային վարակի 3824 նոր դեպք, ինչը համավարակի սկզբից ի վեր առավելագույն ցուցանիշն է: Այս մասին այսօր՝ նոյեմբերի 21-ին, ճեպազրույցի ժամանակ հայտարարել է միջգերատեսչական համակարգող խորհրդին առընթեր գործող շտաբի պետի տեղակալ Բերդիա Սիչինավան:
Ամենաշատ դեպքերը գրանցվել են Թբիլիսիում՝ 1247: Այսպիսով, մայրաքաղաքին բաժին է ընկնում վարակման նոր դեպքերի գրեթե 33% -ը:
Վերջին մեկ օրվա ընթացքում կորոնավիրուսից մահացել է ևս 33 հիվանդ։ Այսպիսով, մահերի ընդհանուր թիվը հասել է 927-ի։
Ապաքինվել է ընդհանուր առմամբ 81783 մարդ, որոնցից 3851-ը՝ վերջին մեկ օրվա ընթացքում։
Հիվանդանոցներում է գտնվում 5976 հիվանդ, քովիդ-հյուրանոցներում բժիշկների հսկողության տակ է 3445 մարդ։ Ծայրահեղ ծանր վիճակում է գտնվում 849 հիվանդ։