Փենսիլվանիայի գերագույն դատարանը մերժել է ԱՄՆ-ի նախագահ Դոնալդ Թրամփի շտաբի հայցը, որտեղ ասվում է այն մասին, որ Ֆիլադելֆիայում սահմանափակել են ձայների հաշվելուն հետևելու դիտորդների հնարավորությունը: Այդ մասին ասվում է դատարանի փաստաթղթում:
Դատարանն ընտրական հանձնաժողովի կեցվածքը համարել է «խելամիտ», քանի որ նրանք «թեկնածուների ներկայացուցիչներին թույլ են տվել հետևել այն բանին, թե ինչպես է հանձնաժողովը իրականացնում իր գործունեությունն ընտրական օրենսգրքին համապատասխան»:
Ավելի վաղ ԱՄՆ-ի երրորդ օկրուգի բողոքարկման դատարանը մերժել է Հանրապետական կուսակցության հայցը, որը պահանջում է անվավեր ճանաչել գրեթե տասը հազար ընտրաթերթիկները, որոնք ուշացումով են եկել Փենսիլվանիա: Թրամփը և նրա փաստաբան Ռուդի Ջուլիանին քանիցս պահանջել են այդ պատճառով անվավեր ճանաչել ավելի քան 600 հազար ձայները, որոնք տրվել են Ֆիլադելֆիայում և Փիթսբուրգում:
20 քվեատու ունեցող Փենսիլվանիան այն հանգուցային նահանգներից մեկն է, որոնք կարող են որոշել ԱՄՆ-ի նախագահի ընտրությունների ելքը, քանի դեռ այնտեղ հաղթողին չեն հայտարարել:
Նաև Թրամփի շտաբը հայց է ներկայացրել Ջորջիայի դատարան՝ տեղի ընտրական հանձնաժողովներից պահանջելով պահպանել փոստով ստացված քվեաթերթիկների հաշվման և պահպանման մասին օրենքը: ԱՄՆ-ում նախագահական ընտրություններն անցկացվել են նոյեմբերի 3-ին:
Առկա տվյալների հիման վրա ամերիկյան առաջատար հեռուստաալիքները հայտարարել են Դեմոկրատական կուսակցությունից թեկնածու Ջո Բայդենի հաղթանակի մասին: Համաշխարհային բազմաթիվ առաջնորդներ արդեն շնորհավորել են նրան: Դրա հետ մեկտեղ ԱՄՆ-ի գործող նախագահ Դոնալդ Թրամփը մտադիր է իր առաջատար լինելը պահանջել դատարանում։
