Հարավարևելյան Ասիայի պետությունների ասոցիացիայի (ASEAN) երկրները և նրանց առևտրային գործընկերները համաձայնագիր են ստորագրել աշխարհի ամենամեծ ազատ առևտրի գոտի ստեղծելու մասին: Հայտնում է ՏԱՍՍ-ը:
Փաստաթուղթն ընդունվել է նոյեմբերի 15-ին`Համապարփակ տարածաշրջանային տնտեսական գործընկերության (RCEP) մասին համաձայնագրի մասնակից երկրների չորրորդ գագաթնաժողովում:
Նշվում է, որ RCEP համաձայնագիրը բարերար ազդեցություն կունենա կորոնավիրուսային համաճարակից տուժած ASEAN երկրների տնտեսությունների վրա: Փաստաթուղթը կստեղծի աշխարհի ամենամեծ ազատ առևտրի գոտին՝ մոտավորապես 2,2 միլիարդ սպառողներով և 28 տրիլիոն դոլար ՀՆԱ-ով, ինչը կազմում է աշխարհի ընդհանուր ՀՆԱ-ի 32%-ից ավելին:
Փաստաթուղթը ստորագրել են ASEAN- ի անդամ երկրները՝ Բրունեյը, Վիետնամը, Ինդոնեզիան, Կամբոջան, Լաոսը, Մալայզիան, Մյանմարը, Սինգապուրը, Թաիլանդը և Ֆիլիպինները, ինչպես նաև նրանց առևտրատնտեսական գործընկերները՝ Ավստրալիան, Նոր Զելանդիան, Չինաստանը, Հարավային Կորեան և Ճապոնիան:
