Ուկրաինան Նիկարագուայի դեմ պատժամիջոցների կիրառման գործընթաց է սկսել այս երկրի դեսպանի՝ Ղրիմ այցելությունից հետո: Այդ մասին նոյեմբերի 10-ին հաղորդել է Ուկրաինայի արտաքին գործերի նախարարության մամուլի ծառայությունը: Հոկտեմբերին Ուկրաինայի նախարարների կաբինետը կարգադրություն է արել, որով պատժամիջոցների սահմանման գործընթաց է նախաձեռնվում Նիկարագուայի դեմ՝ Ղրիմում պատվավոր հյուպատոս նշանակելու համար:
«Ուկրաինայի ԱԳ նախարարությունը նիկարագուական կողմին քանիցս նախազգուշացրել է այնպիսի գործողությունների անթույլատրելիության մասին, որոնք խախտում են մեր պետության ինքնիշխանությունը և տարածքային ամբողջականությունը: Ուկրաինական կողմը պատժամիջոցների կիրառման գործընթաց է սկսել Ուկրաինայի օրենդրությանը համապատասխան և հետագայում ընդունելու է Ուկրաինայի օրենքներով և միջազգային իրավունքի նորմերով նախատեսված բոլոր անհրաժեշտ գործողությունները՝ մեր պետության ինքնիշխանությունը և տարածքային ամբողջականությունը պաշտպանելու համար»,-ասվում է ԱԳ նախարարության հայտարարության մեջ, որը նոյեմբերի 10-ին հրապարակվել է գերատեսչության կայքում:
Ուկրաինայի ԱԳ նախարարությունը բողոք է հայտնել ՌԴ-ում Նիկարագուայի դեսպան Ալբա Ասուսեն Տորեսի՝ Ղրիմ այցելելու պատճառով՝ հյուպատոսական վկայագիր հանձնելու համար: «Մեր պետությունն այդ գործողությունը համարում է խղճուկ և դիտարկում որպես Ուկրաինայի նկատմամբ Նիկարագուայի կողմից բացահայտ ոչ բարեկամական քայլ»,-ասվում է հայտարարության մեջ: Ավելի վաղ ՌԴ նախագահին առընթեր Ղրիմի մշտական ներկայացուցիչ, հանրապետության կառավարության փոխվարչապետ Գեորգի Մուրադովը հայտնել է, որ Նիկարագուայի պատվավոր հյուպատոսությունը կբացվի նոյեմբերի 10-ին Ղրիմում: Այդ նպատակների համար հանրապետություն է ժամանել Ռուսաստանում Նիկարագուայի դեսպանը: Ղրիմում Նիկարագուայի պատվավոր հյուպատոս է նշանակվել Ղրիմի տարածաշրջանում նախագահի նախկին լիազոր ներկայացուցիչ Օլեգ Բելավենցևը: Նիկարագուան Ղրիմը Ռուսաստանի մաս է ճանաչել 2014 թվականին:
