Վերլուծաբան Հակոբ Բադալյանը ֆեյսբուքյան իր էջում գրել է․
Եթե Վահրամ Պողոսյանը հաստատում է, որ ինքն է գրառման հեղինակը եւ էջը չեն կոտրել, ապա կարծում եմ պետք է մեկուսացնել նրան հանրային դաշտից: Ընդ որում, սա չեմ ասում որպես պատժիչ նպատակ: Բացարձակապես:
Պարզապես նկատելի է ռազմական իրադրության եւ ԱՀ նախագահի խոսնակի գործողությունների առնվազն առերեւույթ մեղմ ասած հակադրություն: Խնդիրն այն չէ, որ նա հայտնում է ոչ ականջահաճո տեղեկություն: Ի վերջո, պատերազմի պատրաստ հանրությունն ու պետությունը պետք է լինեն նաեւ այդպիսի տեղեկությունը սառնասիրտ լսելու պատրաստ:
Պատերազմը ռազմական շքերթ չէ: Բայց, հարցն այն է, որ խախտվում է այս պատերազմի հայկական տեղեկատվա-քարոզչական տրամաբանությունը, այն է՝ ռազմական գործողությունների եւ իրադրության մասին պետք է հայտնեն ռազմական պաշտոնական աղբյուրները: Ահա թե ինչու՝ եթե դա բանակի հետ համաձայնեցված մարտավարական-քարոզչական քայլ չէ ուղղված թշնամուն, թեկուզ ներքին հանրությաննն անհանգստացնելու գնով՝ ինչը առնվազն տեսականում ես չեմ բացառի, ապա կնշանակի քայլ է, որը խանգարում է բանակին: Իսկ այդ դեպքում թերեւս հենց բանակն էլ պետք է լուծի այդ հակադրության հարցը եւ շարունակի զբաղվել իր գործով: Եթե իհարկե մենք գործ չունենք ավելի լայն իմաստով ուղղահայացում որոշակի փլուզումների հետ: Բայց, այդ դեպքում էլ, բանակը պետք է լուծի հարցը ավելի «երկար» ուղղահայացի դեպքում, եթե այն չի աշխատում եւ խանգարում է իր գործին:
Խուճապը բոլոր դեպքերում բացարձակապես անտեղի է, հատկապես, երբ այն գեներացնում են մարդիկ, որոնք հիմնականում դիտորդի դերում են եւ պատերազմին հետեւում են երկրպագուական դիրքերից, սիրելի թիմից պահանջելով միայն հաղթանակ: Երկար ստացվեց, ուզում էի կարճ:
