Այսօր լրանում է Հայ ազգային կոնգրեսի ստեղծման երրորդ տարին։ Թե ինչպիսին է Կոնգրեսի եռամյա գործունեության դերը մեր քաղաքական մշակույթում՝ «Առաջին լրատվական»-ի հետ զրույցում սոցիոլոգ Ահարոն Ադիբեկյանը այսպես մեկնաբանեց.
«ՀԱԿ-ը բավական ճկուն, բավական իրատես քաղաքական ուժ է։ ՀԱԿ-ը հասկանում է, որ ծայրահեղ մերժողական ընդդիմության դիրքերում չի կարող բավական ձայներ հավաքել ընտրություններում, այդ պատճառով էլ նա շարժվում է ճկուն քաղաքականությամբ և պրագմատիկորեն է մոտենում խնդիրներին։ Կարևոր է, որ Կոնգրեսը երկխոսության ձեռք է մեկնում, ինչին պատրաստ է արձագանքել իշխանությունը»։ Սոցիոլոգը այս ամենը երեք տարիների ընթացքում արձանագրված լուրջ արդյունքներ համարեց։
Խոսելով ՀԱԿ – իշխանություն երկխոսությունից՝ Ա.Ադիբեկյանը նշեց.
«Ամենակարևոր արդյունքը այն է, որ առաջին անգամ իշխանությունը և ընդդիմությունը պատրաստ են երկխոսության, սրա նախադեպը չի եղել ոչ 1-ին, ոչ 2-րդ նախագահների օրոք։ Ընդդիմության մերժողական դիրքորոշումը միշտ եղել է խոչընդոտ, որ կարողանան քաղաքական համաձայնության գալ։ Կարևոր է, որ մեր կողմերը պատրաստակամ են գնալ դրան։ Դա միայն նրանց անձնական մղումը չէ, կան նաև արտաքին ազդակներ, որոնք ստիպել են գնալ երկխոսության»։