Հայաստանի արդյունաբերողների և գործարարների միության նախագահ Ղազարյանը կարծում է, որ երկու ամիս բավարար ժամանակ է, որպեսզի գործարարները կարողանան գումարներ փոխանցել, պայմանագրեր կնքել այլ շուկաների հետ ու սկսեն թուրքական ապրանքին փոխարինող այլ ապրանքներ ներկրել այլ շուկաներից։ Մեր զրուցակցի խոսքերով՝ շուկաները շատ ճկուն են։ Թուրքական ապրանքներին էլ այլընտրանք առաջին հերթին կարելի է գտնել ԵԱՏՄ շուկայում, Չինաստանում, հեռավոր արևելյան երկրներում, որտեղի ապրանքների որակական հատկանիշները մրցունակ են թուրքական էժան ապրանքներին։ «Որոշակի ապրանքատեսակների մասով կարող են լինել չնչին թանկացումներ, կամ ապրանքների պակաս, բայց մեր շուկան շատ ճկուն է աշխատում, թուրքական ապրանքներն էլ մեր սպառողական շուկայում շատ մեծ սեգմենտ չեն զբաղեցնում։ Հավասարապես մրցակցել են իրանական, չինական, եվրոպական, ԵԱՏՄ շուկայի ապրաքնների հետ։ Այնպես որ, ես որոշակի դժվարություններ տեսնում եմ, բայց անակնկալներ չեն լինի»,- «Առաջին լրատվական»-ի հետ զրույցում ասաց Ղազարյանը՝ հավելելով, որ ինքն արդեն կոչով հանդես է եկել և նույնը պնդում է, որ Հայաստանում հիմա չխոչընդոտեն արդեն ներկրված ապրանքի վաճառքը։ «Ես ուզում եմ, որ սպառողները և ցանցերի աշխատողները մեկ բան հասկանան, որ արդեն ներկրվածը թուրքական տնտեսության վրա իր ազդեցությունը թողել է, և հիմա չպետք է մեր քայլերով վնասենք մեր տնտեսությանը։ Այս մարդիկ հարկեր են վճարել, մատակարարում են իրականացրել, և մենք պետք է աջակցենք այդ ապրանքների սպառմանը, որպեսզի փոքր բիզնեսի ներկայացուցիչները կարողանան վերադասավորվել և նոր շուկաներ գտնել։ Այլապես այդ հոգսը ևս կարող է ընկնել պետության նրա, որն անցանկալի է այսօրվա պայմաններում»,- ասաց Ղազարյանը։
Մեր զրուցակցից հետաքրքրվեցինք՝ հնարավո՞ր է մինչև դեկտեմբեր 31-ը տնտեսվարողները շարունակեն ներկրումները ու հունվարից արդեն վաճառքի խնդիր ունենան. «Արգելքը հստակ, օրենքի տեսքով սահմանվել է և չեմ կարծում, որ այն ապրանքները, որոնք երկար սպառման կարիք ունեն և ցանցերին պետք է տրվեն, դրանց ներկրումը կիրականացվի։ Կներկրվեն հիմնականում հումք, սարքավորումներ, որոնք հիմնականում արգելանքի ցուցակի մեջ չեն մտնում։ Դա ամեն մի գործարարի որոշելիքն է, բայց, իմ կարծիքով՝ գործարարները, լավ հասկանալով ազգային պետական շահը և իրենց բիզնեսի հեռանկարը, այդ քայլին չեն գնա և մինչև դեկտեմբերի 31-ն այլևս ներկրումներ չեն իրականացնի, որ հետո փաստի առաջ չկանգնեն»,- ասաց Ղազարյանը։
Երևանի առևտրաարդյունաբերական պալատն այս օրերին գործատուների հետ ակտիվ աշխատում է և համատեղ ջանքերով փորձում են նոր շուկաներ գտնել։ Պալատի տնօրեն Անդրանիկ Ալեքսանյանն «Առաջին լրատվական»-ի հետ զրույցում ասաց, որ մինչ նոր շուկաներ գտնելը հարկավոր է, որ խոչընդոտներ չստեղծվեն արդեն իսկ ներկրված ապրանքի իրացման հետ կապված, քանի որ գործարարները դրա վրա գումար են ծախսել, հարկեր են վճարել։ Բացի դրանից՝ հարկավոր է նաև հստակ տարբերակում մտցնել թուրքական ապրանք, թուրքական հումք և թուրքական ծառայության միջև։ «Մոտակա օրերին մենք բիզնեսի ներկայացուցիչների հետ հանդիպումներ կունենանք, նրանք կասեն, թե ինչ խնդիրներ ունեն, ինչով են զբաղվել։ Եթե, օրինակի համար, այդ բիզնեսը զբաղված է շոր ու կոշիկի վաճառքով, ապա փորձենք իր համար գտնել շոր ու կոշիկի նոր բիզնես դրսում, օրինակ, Չինաստանում, և ուղղորդենք այդ գործարարին այնտեղ։ Կարող է նաև չարտերային չվերթ կազմակերպել, մերոնք գնան մեծածախ գնումներ իրականացնեն, բերեն ու վաճառեն։ Շատ բարդ է հումքի խնդիրը, ով որ արտադրություն ունի և հումք է ներկրում։ Դա բավական մեծ մաս է՝ 250-300 միլիոն դոլարի սահմաններում։ Պալատը հիմա ուզում է դա հասկանալ, թե դրա մեջ ինչ կոմպոնենտներ են մտնում և ինչ առաջարկի բիզնեսին, քանի որ մենք դեռ չգիտենք՝ մեզ ինչ քանակի, ինչ կարգի ապրանք է պետք ու լոգիստիկան ոնց է լինելու, քանի որ կարող ենք շատ լավ ապրանք գտնել, բայց գնի խնդիր լինի։ Գին-որակ խնդիրն է։ Բայց մենք առաջիկա օրերին կունենանք այդ ցուցակը, թե հայերը ինչ են ներմուծել Թուրքիայից ու կփորձենք այլ երկրներում նույն ապրանքից գտնել ու ներկայացնել մեր գործարարներին»,- ասաց Ալեքսանյանը։
