ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանի գնահատմամբ՝ Սերժ Սարգսյանն այնքան էլ խանդավառված չէր Ռուսաստանի նախագահ Դմիտրի Մեդվեդևի ուղերձի բովանդակությամբ: Նա նշեց, որ դա ակնհայտ էր Լավրովի հետ հանդիպումից հետո. «Բայց Ադրբեջանի նախագահի հակազդեցությունն էլ շատ տարբեր չէր: Եթե ինչ-որ տեղ դրական բան լիներ, ապա մենք արդեն կզգայինք ռուսական կողմի արձագանքը»:
Մանոյանը լրագրողներին փոխանցեց, որ տեղյակ չէ՝ ինչ է պարունակում Մեդվեդևի ուղերձը: Նրա կարծիքով, ուղերձի բովանդակությունը պետք է հրապարակել, սակայն պատշաճ է, որ դա անի ուղերձը ներկայացրած կողմը. «Մեկ ամիս է՝ խոսում ենք, բայց ոչ ոք չգիտի, թե ինչի մասին է այդ ուղերձը։ Սակայն պարզ է, որ մի բան այն չէ, և ռուսական կողմը պետք է բացահայտի իր առաջարկները, որպեսզի մենք հասկանանք, թե ինչու չկա կողմերի դրական պատասխանը»:
Կիրո Մանոյանը նկատեց, որ Ռուսաստանի՝ ԼՂ հարցում համաձայնություն ձեռք բերելու շահագրգռվածությունը պայմանավորված է նրանով, որ 2008-ի ռուս-վրացական պատերազմից հետո Ռուսաստանը կարիք ունի հաստատելու և ամրապնդելու այն հանգամանքը, որ սա իրենց «հակակշռի տարածքն» է: Մանոյանը նկատեց, որ այդ ակտիվությունը պայմանավորված է նաև նրանով, որ Ռուսաստանում առաջիկայում սպասվում են ընտրություններ, և Մեդվեդևը ձգտում է դրական արդյունք ձեռք բերել ԼՂ հարցի կարգավորման գործընթացում:
Ըստ ՀՅԴ ներկայացուցչի՝ դեռ պարզ չէ, թե ինչ քայլեր է անելու Մեդվեդևը, սակայն պարզ է, որ հայկական և ադրբեջանական կողմերի կեցվածքը հիմնական խնդրի` ԼՂ կարգավիճակի վերաբերյալ, հստակ է:
Հարցին, թե արդյոք տեղին չէ՞, որ հայաստանյան քաղաքական ուժերը Սերժ Սարգսյանից պահանջեն Մեդվեդևի ուղերձի բովանդակությունը, Մանոյանը պատասխանեց, որ անհրաժեշտ է: Իսկ հարցին ի պատասխան, թե ինչո՞ւ հենց ՀՅԴ-ն այդ պահանջը չի ներկայացնում, նկատեց. «Ո՞վ է ասում, որ չենք պահանջել»:
Այդուամենայնիվ, քիչ անց Մանոյանը ասաց, որ պաշտոնական հայտարարություն և պահանջ իրենք չեն ներկայացրել, և ինքը կարծում է, որ ուղերձի բովանդակությունը պետք է բացահայտի ռուսական կողմը: