Ռուսաստանի նախագահ Դմիտրի Մեդվեդևը երեկ ռազմածովային նավատորմի օրվա կապակցությամբ պետք է մեկներ Սևաստոպոլ, սակայն այցը հետաձգվել է, և նա մեկնել է Կալինինգրադի Բալտիյսկ քաղաք: Այս մասին գրում է Коммерсант թերթը:
Ինչպես թերթին ասել են Ուկրաինայի արտաքին գործերի նախարարությունից, երկու երկրների արտաքին գերատեսչական մարմիններն ակտիվ աշխատանքներ էին վարում, որպեսզի Մեդվեդևն այդ տոնի օրը ժամաներ Սևաստոպոլ. «Սակայն համաձայնության գալ չի հաջողվել»,- ասել է ուկրաինացի դիվանագետը: Նա շեշտել է, որ միայն մի քանի մարդ գիտեն ռուս-ուկրաինական հարաբերությունների բոլոր խութերի մասին: Այն, որ ընթացել են բանակցություններ, որոնք ավարտվել են անհաջողությամբ՝ հաստատել են նաև Ռուսաստանի արտգործնախարարությունում:
Ուկրաինական ղեկավարությունում թերթի աղբյուրները կարծում են, որ հերթական անգամ ռուս-ուկրաինական հարաբերությունների սրվելու հիմնական պատճառն այն է, որ կան քաղաքական լուրջ հակասություններ՝ կապված Ուկրաինա-ԱՄՆ և Ուկրաինա-ՆԱՏՕ հարաբերությունների հետ: Ռուսաստանին մտահոգում են անվտանգության խնդիրները սևծովյան տարածաշրջանում, քանի որ Արևմուտքն սկսել է ավելի ակտիվ ներգրավվել տարածաշրջանային զարգացումներում:
Ուկրաինայում ասել են, որ կա նաև նավթային լրջագույն խնդիր. Ռուսաստանը շարունակում է պնդել, որ ռուսական «Գազպրոմն» ու ուկրաինական «Նավթոգազը» պետք է միավորվեն, ինչը ձեռնտու չէ ուկրաինական կողմին: Սրան ի պատասխան՝ ռուսներն ասել են՝ «եթե այս հարցում համաձայն չեք, ուրեմն չի լինի նաև ՌԴ նախագահի այցելությունը»:
Կրեմլում այս փաստը հաստատել են:
