Իրավական մեխանիզմներ գոյություն ունեն. 1998-ից գործում է միջազգային քրեական դատարան, որն ունի ունիվերսալ լիազորություններ: Այս մասին «Առաջին լրատվական»-ի հետ զրույցում նշեց Ռուսաստանի հայ փաստաբանների միության նախագահ Ռուբեն Կիրակոսյանը՝ անդրադառնալով պատերազմում ադրբեջանական կողմի կատարած հանցագործություններին և դրանց հնարավոր իրավական գնահատականներին:
Նրա խոսքով՝ այդ միջազգային քրեական դատարանը զբաղվում է պատերազմի հետևանքների, կոտորածների, մարդկանց զանգվածային ոչնչացման հետևանքների վերաբերյալ գնահատական տալով՝ քրեական օրենսդրության համաձայն:
«Դրա համար կան մեխանիզմներ, բայց դրանից առաջ այս պահին ամենակարևոր խնդիրն է ճշգրիտ արձանագրել, ֆիքսել առկա պատկերը, եղած հանցագործությունները, որպեսզի դա լինի ընդունելի վարույթի համաձայն, որպեսզի հետագայում նրանք չկարողանան բողոքարկել: Դրանք կլինեն լուսանկարներ, տեսագրություններ կամ փաստաթղթեր:
Որքան գիտեմ, հիմա Արցախի մարդու իրավունքների պաշտպանի գրասենյակը զբաղվում է դրանով: Կարծում եմ՝ այս շրջանում անկախ դիտորդներ պետք է հրավիրել, որոնք ևս հետո կարող են հարցի վերաբերյալ վկայություններ տալ»,- ասաց Ռուբեն Կիրակոսյանը:
Հարցին, թե այս ուղղությամբ ինչ աշխատանքներ է իրականացնում Ռուսաստանի հայ փաստաբանների միության նախագահը, նա պատասխանեց. «Մենք այստեղ իրականացնում ենք իրավաբանական հետազոտություններ, աշխատում ենք ռուս իրավապահների հետ, փորձում ենք հրավիրել նրանց ուշադրությունը, կփորձենք ստեղծել իրավաբանական ոչ հայկական հանձնաժողով, որը կկարողանա աջակցել այս գործին»:
