ԿԸՀ նախագահ Գարեգին Ազարյանն անցյալ շաբաթավերջին «Ազատություն» ռադիոկայանին ասել է, որ ընտրական համակարգը ուղղակի ի զորու չէ մեկ ամսվա ընթացքում ուսուցանել 14 հազար մարդու, որոնք աշխատելու են ընտրական հանձնաժողովներում: Գարեգին Ազարյանը մատնանշել է Ընտրական նոր օրենսգրքի պահանջը, ըստ որի հանձնաժողովների անդամների ուսուցանումը պարտադիր է:
Այդ հանգամանքը շատերն են նշում, ասելով, թե հենց այդ իսկ պատճառով արտահերթ ընտրությունն անիրատեսական է և հակասում է օրենքին: Իրականում սակայն, արտահերթի առումով բացարձակապես հարկ չկա շեշտվել ժամկետների վրա: Այստեղ խնդիրը ամենևին այն չէ, թե երբ կանցկացվի ընտրությունը: Կարևորը, որ կայացվի դրա վերաբերյալ քաղաքական որոշում: Իսկ այդ դեպքում արդեն, ընտրությունը կարող է անցկացվել թեկուզ դեկտեմբերին կամ հունվարին, երբ ընտրական հանձնաժողովների անդամները հանգիստ կկարողանան ուսանել:
Բայց, մյուս կողմից էլ այդ արհեստական դրույթը իրականում բացարձակապես անտեղի և ավելորդ դրույթ է: Ի վերջո Հայաստանի ընտրական հանձնաժողովների անդամները չեն ուսանում այն, ինչ անում են ընտրության ընթացքում: Այսինքն, նրանց սովորեցնում են չկեղծել, իսկ նրանք զբաղվում են կեղծիքով: Հետևաբար, նրանց պետք է ոչ թե սովորեցնել ինչ որ բան, ուսուցանել, այլ ընդամենը պետք է արգելել անել այն, ինչով զբաղվում էին մինչև հիմա` կեղծել ընտրությունները: Իսկ դա, կարծում ենք, հնարավոր է անել ընդամենը մի ժամում` վերից վար տեղեկացնելով, որ ընտրակեղծիք թույլ տվողը ուղղակիորեն ենթարկվելու է քրեական պատասխանատվության:
Այլ կերպ ասած, արտահերթ ընտրություններին պետք է պատրաստվել ոչ թե ընտրական, այլ քրեական օրենսգրքով և քրեական օրենսգրքի պահանջներին պետք է համապատասխանեցնել արտահերթ ընտրության գործընթացը: Այդ դեպքում հանձնաժողովների անդամները իրենք էլ չեն նկատի, թե ինչպես Գարեգին Ազարյանի պայծառ ղեկավարությամբ մի վարկյանում կկատարեն ընտրական օրենսգրքի բոլոր դրույթները: Այնպես որ բանալին քրեական, ոչ թե ընտրական օրենսգրքում է, և ընդամենն անհրաժեշտ է այն գործածելու քաղաքական կամքի առկայությունն իշխանության մոտ:
