«Կարևորը՝ հաղթենք, մնացածը ընթացքում կվերականգնենք»,- ասում է «Կոմպակտ Ռիելթի» անշարժ գույքի գործակալության տնօրեն Էդգար Թամեյանը։
Ադրբեջանաթուրքական հարձակումից ու սանձազերծած լայնածավալ պատերազմի առաջին իսկ օրվանից ՀՀ-ում գործող անշարժ գույքի գրեթե բոլոր գործակալությունները լծվեցին Արցախից ժամանակավոր Երևան տեղափոխված անձանց կեցության վայրի հարցի լուծմանը։ Բացի տուն ու հյուրանոցային սենյակներ գտնելուց, գործակալության աշխատակիցները սնունդ, հագուստ, անհրաժեշտ պարագաներ են հավաքում, փոխանցում դրանց կարիք ունեցողներին։
«Այս ընթացքում ոչ մի գործակալություն գումար չի աշխատել վարձով բնակարանների հանձնումից։ Տան սեփականատերերն էլ իրենց կամքով անվճար հանձնել են բնակարանները արցախցիներին»,- «Առաջին լրատվական»-ի հետ զրույցում նշում է մեր զրուցակիցը։
Կորոնավիրուսից հետո պատերազմը երկրորդ հարվածն է անշարժ գույքի շուկային, փաստում է Էդգար Թամեյանը։ «Բայց դե կարևորը՝ հաղթենք, մնացածը ընթացքում կվերականգնվի։ Պետք է ասեմ, որ այս պահին անշարժ գույքի շուկայում մեռած վիճակ է։ Վաճառքների մասով գործարքներ չկան։ Անգամ հիփոթեքով գործարք ունեինք, որը ավարտին էր հասել, բայց բանկում մերժեցին։ Վաճառք չկա, հետաքրքրվող էլ չկա»,- ասում է ոլորտի ներկայացուցիչը։
Ըստ Թամեյանի՝ վաճառքի ու վարձակալության գներում փոփոխություն տեղի չի ունեցել։ Թե ինչպես կզարգանա ոլորտը պատերազմից հետո, մեր զրուցակիցը դժվարացավ պատասխանել․ «Կարծում եմ՝ գնանկում կլինի։ Բայց դե հիմա ամենակարևորը ռազմաճակատում հաղթանակն է։ Ուզում եմ իմ ցավակցությունը հայտնել մեր զոհված հերոս տղաների հարազատներին։ Տղաներ, ձեր սխրանքն անմահ է»։