Մարդու իրավունքների եվրոպական դատարանում ՀՀ ներկայացուցչությունը քայլեր կձեռնարկի՝ ադրբեջանական լրատվամիջոցներում տարածված՝ ենթադրաբար հայ ռազմագերիների գնդակահարության տեսանյութի կապակցությամբ։ ՄԻԵԴ-ում ՀՀ ներկայացուցիչ Եղիշե Կիրակոսյանը ասաց, որ ՄԻԵԴ-ին կտեղեկացնեն տեսանյութի մասին, իսկ թե ինչ ձևաչափով դա կիրականացվի՝ դեռևս քննարկման փուլում է։
«Ամեն դեպքում՝ միանշանակ կուղարկվի ՄԻԵԴ»,- ընդգծեց Կիրակոսյանը։
Նշենք, որ ադրբեջանական լրատվամիջոցներով ակտիվորեն տարածել է տեսանյութ, որը ներկայացվում է որպես հայ ռազմագերիների գնդակահարություն։ Հստակ տեղեկություն չկա տեսանյութի ճշմարտացիության վերաբերյալ, ամենայն հավանականությամբ, դա Ադրբեջանի կողմից քարոզչական հերթական տեսանյութն է, այսինքն՝ ադրբեջանական վայրագ ձեռագիրը և հայատյաց քաղաքականությունը վկայությունը։ ՄԻԵԴ-ում ՀՀ ներկայացուցիչը «Փաստինֆո»-ի հետ զրույցում նշեց, որ դա պատերազմական հանցագործություն է՝ կամայական գնդակահարությունը խստիվ արգելված է ինչպես Ժնևյան կոնվենցիայով, այնպես էլ՝ միջազգային մարդասիրական և սովորութային իրավունքներով։
Առկա է վատ վերաբերմունքի տարր, կոպտորեն խախտվում են մարդասիրական իրավունքը՝ գերեվարված անձանց, ռազմագերիների իրավական կարգավիճակի և նվազագույն պահանջների վերաբերյալ, այլ խոսքով՝ Ադրբեջանի կողմից պատերազմական հանցագործությունները շարունակվում են։
Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։ Թեև հոկտեմբերի 10-ին՝ ժամը 12-ից հումանիտար հրադադար հայտարարելու մասին Մոսկվայում Հայաստանի, Ռուսաստանի ու Ադրբեջանի արտգործնախարարների ձեռք բերած պայմանավորվածությանը, Ադրբեջանը խախտել է հրադադարը: