Վարչապետ Նիկոլ Փաշինյանի գլխավորությամբ հոկտեմբերի 14-ին տեղի է ունեցել ԱԽ արտահերթ նիստ, որին մասնակցել են նաև ԱԽ անդամ չհանդիսացող Հայաստանի նախագահը, ԱԺ նախագահը և վարչապետի աշխատակազմի ղեկավարը: Նիստի ընթացքում քննարկվել են պատերազմական իրավիճակը և հետագա քայլերը:
Նիստից մի քանի ժամ առաջ վարչապետ Փաշինյանը ուղերձով դիմել էր ժողովրդին: Ուղերձում նա գործնականում ամփոփել էր պատերազմի անցնող 18 օրերը, իրավիճակը ռազմաճակատում, խոսել հյուսիսում ու հարավում որոշակի նահանջի մասին, միաժամանակ, սակայն, ազդարարելով, որ դա ասում է ոչ թե հուսահատության, այլ ճշմարտությունը չթաքցնելու համար: Դրանով հանդերձ, Նիկոլ Փաշինյանը խոսել էր իրավիճակի քաղաքական և աշխարհաքաղաքական ասպեկտի մասին, այդ իմաստով, շոշափելով նաև արցախյան հարցի նոր համատեքստը և կարգավորման, այսպես ասած, հին տարբերակների անընդունելիությունը: Նիկոլ Փաշինյանը հայտարարել էր, որ Հայաստանը կանգնելու է երջանիկ ու ազատ Արցախի համար: Ըստ էության, այս իրողությունները հիմք են տալիս խոսելու այն մասին, որ վարչապետն իր ուղերձով ամփոփել է պատերազմի մի որոշակի փուլ՝ ձեռքբերումներով և, ցավոք սրտի, նաև կորուստներով, որոնցից, անշուշտ, ամենացավալին և ողբերգականը մարդկային կորուստներն են:
Վարչապետի ուղերձը նաև գործնականում ուրվագծում է պատերազմի նոր փուլի որոշակի հեռանկար, և դրան ժամեր անց հաջորդած անվտանգության խորհրդի արտահերթ նիստն էլ վկայում է հետագա քայլերի քննարկումով, որ Հայաստանը պատրաստվում է այդ փուլին: Որքանո՞վ է այդ տպավորությունը համապատասխանում իրականությանը, կամ ի՞նչ փուլի մասին, ինչպիսի հեռանկարների, ռազմականի ու քաղաքականի ինչպիսի հարաբերակցության մասին է խոսքը, կարող ենք անել միայն ենթադրություններ կամ սուբյեկտիվ մեկնաբանությունը, ինչի ժամանակը չէ թերևս:
Անկասկած է մի բան, որ Հայաստանից ու Արցախից պահանջվում է ջանքի և ուժի գերլարում, բոլոր ռեսուրսների մոբիլիզացիա և ներքին կայուն ու միասնական կեցվածք: Այդ իմաստով նաև հատկանշական էր հոկտեմբերի 12-ին վարչապետի հանդիպումը արտախորհրդարանական քաղաքական ուժերի հետ: Պատերազմը, անշուշտ, չունի միայն ռազմական գիծ, և Հայաստանը պետք է մոբիլիզացնի նաև իր քաղաքական ռեսուրսը: