Եվրամիության անդամ երկրները պատրաստվում են առեւտրական համաձայնագրի կնքման հարցի շուրջը Մեծ Բրիտանիայի հետ բանակցությունների ձախողմանը, համաձայնագիր, որ կկարգավորեր Լոնդոնի եւ Բրյուսելի փոխհարաբերությունները Brexit-ի անցումային շրջանի ավարտից հետո: Հոկտեմբերի 12-ին այդ մասին հաղորդել է The Daily Telegraph պարբերականը:
Հրատարակության բարձրաստիճան դիվանագիտական աղբյուրը կարծում է, որ կողմերը փոխադարձ անզիջողության պատճառով կարող են գործարքը չհամաձայնեցնել մինչեւ վերջին ժամկետի (հոկտեմբերի 15) ավարտը, իսկ դա իր հերթին հեռանկարում սպառնում է «քաոսի շրջանով»: Ըստ որում ԵՄ-ի երկրներից մեկի դիվանագետը չի բացառել ապագայում առեւտրական բանակցությունների վերսկսման հնարավորությունը: «Ոչ մի պատճառ չկա ասելու, որ գործարքի բացակայության պատճառով երբեք կրկին չեն կարող բանակցություններ լինել»,- ասել է նա:
Սակայն թերթի մի այլ եվրոպական աղբյուր պնդել է, որ Բրյուսելի հետ առեւտրական բանակցությունների վերսկսում համաձայնագրի բացակայության դեպքում հետագայում լինել չի կարող: Դրա փոխարեն Մեծ Բրիտանիան հարկադրված կլինի երկկողմանի համաձայնագրեր կնքել առանձին անդամ երկրների հետ՝ տնտեսական հետեւանքները մեղմացնելու համար:
Միացյալ Թագավորությունը եւ Եվրամիությունն ավելի վաղ խոստովանել են, որ գործարքի շուրջը բանակցություններն ընթանում են բարդ, մինչեւ տարեվերջ, երբ կդադարի գործել Brexit-ի անցումային շրջանը, ավելի ու ավելի քիչ ժամանակ է մնում: Մեծ Բրիտանիայի վարչապետ Բորիս Ջոնսոնն անցյալում հոկտեմբերի 15-ը սահմանել է վերջին օրը համաձայնության հասնելու համար (այդ օրը Բրյուսելում պլանավորված է Եվրամիության գագանաժողովը): Նրա խոսքով՝ հոկտեմբերի կեսերից հետո բանակցությունները շարունակելն իմաստ չունի, հաղորդել է ՏԱՍՍ-ը:
