ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունեց «Հազարամյակի մարտահրավեր» կորպորացիայի ենթակառուցվածքների տնօրեն Հիմեշ Դանգիլին և կորպորացիայի հայաստանյան գրասենյակի տնօրենի ժամանակավոր պաշտոնակատար Սոնյա Շահրիգյանին: Հանդիպմանը ներկա էր նաև «ՀՄՀ-Հայաստան» ՊՈԱԿ-ի գլխավոր գործադիր տնօրեն Արա Հովսեփյանը:
Քննարկվեցին «Հազարամյակի մարտահրավեր հիմնադրամ-Հայաստան» ծրագրի ավարտական աշխատանքների հետ կապված հարցեր:
Նշվեց, որ ծրագրով իրականացվող հիմնական աշխատանքները կատարված են: Արդեն շահագործման են հանձնված մայր ջրանցքները, ընթացքի մեջ են և առաջիկայում ամբողջովին կավարտվեն պոմպակայանների, երրորդ կարգի ջրագծերի, դրենաժային համակարգի վերականգնման բաղադրիչներով իրականացվող աշխատանքները: Արձանագրվել են որոշակի խնդիրներ
աշխատանքի որակի հետ կապված, մասնավորապես՝ երրորդ կարգի ջրանցքներում, որոնք կապալառու կազմակերպությունները պետք է վերացնեն:
Երկուստեք կարևորվեց ավարտական փուլում կապալառուների և վերահսկող կազմակերպությունների առավել համագործակցված աշխատանքը՝ հնարավորինս սեղմ ժամկետներում ծրագրերն ավարտելու նպատակով:
Փոխվարչապետը տեղեկացրեց, որ ձևավորվելու է աշխատանքյաին խումբ՝ ՀՀ ՏԿՆ ջրային տնտեսության պետական կոմիտեի մասնագետների մասնակցությամբ, որն առաջիկա շաբաթների ընթացքում կգույքագրի ընթացիկ ծրագրերում առկա խնդիրները՝ հաշվի առնելով, որ մինչև պայմանագրի ավարտը պետք է իրականացվեն բոլոր միջոցառումները, որպեսզի կապալառու կազմակերպությունները վերացնեն արձանագրված թերությունները:
Ա.Գևորգյանը նշեց նաև, որ ՀՀ ՏԿՆ ջրային տնտեսության պետական կոմիտեին հանձնարարվել է աշխատել ՋՕԸ-երի հետ, որպեսզի թերի իրականացված որևէ աշխատանք չընդունվի:
Հանդիպմանը քննարկվեցին պոմպերի հետշահագործման հետ կապված խնդիրները: Այս առնչությամբ փոխվարչապետը նշեց, որ հանրապետությունում գործող ՋՕԸ-երն ունեն անհրաժեշտ կարողությունները նոր պոմպերի սպասարկումը կազմակերպելու համար, իսկ լուրջ տեխնիկական խնդիրների ի հայտ գալու պարագայում առկա են այն մասնագիտական կառույցները, որոնց միջոցով ՋՕԸ-երը, ելնելով սեփական շահագրգռվածությունից, կարող են լուծել տեխնիկամասնագիտական խնդիրները: Փոխվարչապետն ընդունելի համարեց նաև ՋՕԸ-երի և մասնագիտացված ծառայություններ մատուցող ընկերությունների համագործակցությունն ըստ մարզերի կանոնակարգելու հնարավորությունը:
Անդրադարձ կատարվեց նաև երաշխիքային ժամկետում թերությունները վերացնող կազմակերպության գործունեության նկատմամբ վերահսկողության կազմակերպման հարցերին:
Փոխվարչապետը մեկ անգամ ևս վստահեցրեց, որ ՀՀ կառավարությունը պատրաստակամ է իրականացնել հնարավոր բոլոր գործողությունները՝ մինչև պայմանագրով սահմանված ժամկետները ծրագիրն ամբողջական և որակով իրականացնելու համար:
«ՀՄՀ» կորպորացիայի պատասխանատուները գնահատելով իրականացվող ջանքերը՝ հույս հյատնեցին, որ ընթացքում ի հայտ եկող տեխնիկական խնդիրները համատեղ աշխատանքների շնորհիվ կստանան իրենց լուծումները:
