Արցախի Անվտանգության խորհրդի քարտուղար Սամվել Բաբայանը հանդիպել է Արցախի խորհրդարանի պատգամավորների հետ և մի շարք ուշագրավ հայտարարություններ արել. «Մենք ռեգիոնալ այն վիճակում չենք, որ ներսում ինչ-որ խաղեր տանք։ ԱԽ-ն Արցախում առանձին իշխանություն չէ, այլ ենթակա է նախագահին և կատարում է նախագահի կարգադրությունները»։
Սամվել Բաբայանի այս հայտարարությունները փաստացի պատասխան են հայաստանյան մամուլի այն տեղեկություններին, թե նա Արցախում ուզում է ընդլայնել իր ազդեցությունը՝ նախագահ Արայիկ Հարությունյանին շրջանցելով, ինչը դուր չի եկել Հայաստանի իշխանությանը, ու Երևանը փորձում է միջամտել ու կանխել այդ իրավիճակը:
Քաղաքագետ Արմեն Վարդանյանն «Առաջին լրատվական»-ի հետ զրույցում, անդրադառնալով Սամվել Բաբայանի հայտարարություններին, նշեց. «Վերջին շրջանում ակտիվ էին խոսակցություններն այն մասին, թե Արցախում երկիշխանություն է ձևավորվել։ Սամվել Բաբայանը երբեմն հայտարարություններ է անում, որոնք հակասում են պաշտոնական տեսակետին՝ մանավանդ արցախյան կարգավորման հարցով։ Եվ այդ տեսանկյունից պետք է ասեմ, որ պարոն Բաբայանի որոշ հայտարարություններն իրոք մտահոգիչ էին։ Քանի որ նա այլևս անկախ, ընդդիմադիր քաղաքական գործիչ չէ, պատերազմի մասնակցած զորահրամանատար, նա արդեն Արցախի Անվտանգության խորհրդի քարտուղարն է, նրա ղեկավարած կուսակցությունը կոալիցիոն կառավարության մեջ է, դա ենթադրում է, որ երկրի իշխանության ու Սամվել Բաբայանի հայտարարությունները պետք է լինեն սինխրոնիզացված, միմյանց համահունչ»։
Ըստ Վարդանյանի՝ հավանաբար այդ կասկածները փարատելու համար է Սամվել Բաբայանը հանդես եկել նման հայտարարություններով: «Դա միայն ողջունելի է, հուսով եմ՝ երկիշխանության դրսևորումներ չեն լինի»,- եզրափակեց նա։
Քաղաքագետ Ռոբերտ Ղևոնդյանն էլ «Առաջին լրատվական»-ի հետ զրույցում նշեց՝ իրերի դասավորությունը հասկացող քաղաքական գործիչները, քաղաքագետներն ու վերլուծաբանները Արցախում երկիշխանություն հաստատելու վտանգ այսպես թե այնպես չէին տեսնում: «Բայց կան մարդիկ, որոնք փորձում են այս հարցի շուրջ շահարկումներ անել, որպեսզի Հայաստանի ու Արցախի հասարակությունների մեջ իշխանությունների հանդեպ վստահությունը կասկածի տակ դնեն, ուստի նման թյուրիմացություններից զերծ պահելու համար նման հայտարարություն արվեց։ Արցախում կա լեգիտիմ նախագահ, որն իր հակառակորդներից մեկին պատասխանատու պաշտոնի է նշանակել, նաև նրա հետ համաձայնության կառավարություն ձևավորել. սա հասուն քաղաքական գիտակցություն ունենալու պետական կառավարման մասին է վկայում»,- նշեց նա։
Արցախում երկիշխանություն հաստատելու խոսակցությունները, քաղաքագետի դիտարկմամբ, մոլորեցնելու փորձ են. «Ինչքան էլ նման խոսակցությունները հիմքեր չունենան, որոշակի ազդեցություն ունենում են, դրանք չեզոքացնելու համար ժամանակ առ ժամանակ նման հայտարարությունների անհրաժեշտություն է առաջանում, ինչն ընդամենը իրական վիճակը ցույց տալու խնդիր է լուծում։ Սա կարող ենք տեսնել նաև այլ ոլորտներում, որտեղ կան ֆեյքային հարձակումներ»։
