Երևանի պետական համալսարանում այս տարի էականորեն նվազել են տարբեր ֆակուլտետներին հատկացված տեղերը, hետևաբար նաև՝ դասախոսների ժամաքանակները: Նախորդ տարվա համեմատ դրանք պակասել են 512-ով։ Տնտեսագիտական ֆակուլտետին 52 տեղ քիչ է հատկացվել, հայոց լեզվի և գրականության, անգլերենի, գերմաներենի և հաղորդակցության ֆակուլտետներում կրճատումը տեղի է ունեցել 50-ական տեղերի չափով։ Նախօրեին ԵՊՀ ռեկտորի ԺՊ Գեղամ Գևորգյանն իր ասուլիսի ժամանակ ընդունելության տեղերի կրճատման մասին խոսելիս նշել էր, որ նախաձեռնվել է իրատեսական պլանավորում, որպեսզի լինի որակյալ ընդունելություն։
«Առաջին լրատվական»-ի հետ զրույցում ԵՊՀ Հայ բանասիրության ֆակուլտետի դասախոս, դոցենտ Արշալույս Գալստյանը նախ նշեց՝ առաջիկայում կերևա, թե ինչքանով են որակյալ ուսանողներ ընդունվել։ «Այս պահին կան ընդունելության արդյունքներ՝ որպես փաստ։ Նախորդ տարիներին Հայ բանասիրության ֆակուլտետի համար նախատեսված էր 120 տեղ, եթե չեմ սխալվում։ Ֆակուլտետ ընդունվում էր առնվազն 120 ուսանող։ Այս տարի տեղերը պակասելուց հետո, իմ տվյալներով, ֆակուլտետ ընդունվել է մոտ 75 ուսանող։ Եթե ժամերի հարցով ենք նայում, նախորդ տարիներին մեր ուսանողները բաժանվում էին երկու հոսքային մեծ խմբերի։ Այս դեպքում հոսքային խմբերի բաժանում չի լինում, ինչն իր հերթին ենթադրում է այդքան ժամաքանակի պակասում։ Թվաքանակի առումով այս խնդիրը կա։ Ղեկավարությունը դա պատճառաբանում է որակի բարձրացումով։ Չեմ կարող ասել, թե որքանով դա կարդարացնի իրեն։ Ընդունելության արդյունքները մենք չենք ամփոփում։ Իսկ 75 դիմորդի ընդունելությունը ենթադրել է տալիս, որ շեմը բարձր է եղել»,- մանրամասնեց Արշալույս Գալստյանը։
Համալսարանի դասախոսի խոսքով՝ ժամաքանակի կրճատումը բերում է ամբիոնում դասախոսների աշխատավարձերի կրճատման։ Մեր զրուցակիցը դժվարացավ ասել, թե ինչքանով այդ կրճատումը կհանգեցնի դժգոհության դասախոսների շրջանում, սակայն, Գալստյանի խոսքով, ոչ մի դասախոսի համար հաճելի չէ աշխատավարձի կրճատումը։ «Օրինակը բերեմ ինձ վրա։ Ես ԵՊՀ դոցենտ եմ։ Դոցենտի կես դրույքը ենթադրում է, որ ես տարեկան համալսարանում պետք է 350-ին մոտ ժամ ունենամ։ Հետևաբար պակասում են ամբիոնային ընդհանուր ժամերը ու աշխատավարձը։ Բայց ոչ թե որպես դոցենտ իմ աշխատավարձը կարող է պակասել։ Ես դժվարանում եմ ասել՝ դա բողոքի ալիք կբարձրացնի՞, թե՞ ոչ։ Բայց եթե մարդու ժամաքանակը պակասում է, ու մարդը վարձատրվում է ըստ այդ ժամաքանակի, բնականաբար որևէ դասախոս չի կարող ուրախ լինել, որ իր ծանրաբեռնվածությունը պակասել է։ Որքանով դա կդրսևորվի որպես դժգոհություն, դա էլ չեմ կարող ասել»,- շեշտեց Արշալույս Գալստյանը։
ԵՊՀ տնտեսագիտության ֆակուլտետի Ֆինանսահաշվային ամբիոնի վարիչ Հայկ Մնացականյանը մեզ հետ զրույցում ասաց, որ առանձնապես խնդիր չի տեսնում հատկացված տեղերի կրճատման հետ կապված։ «Սովորաբար հոսքերը եղել են 60-65 հոգանոց։ Հոսքերի կրճատում, ուսանողների կրճատում կոնկրետ տնտեսագիտության ֆակուլտետում ես չեմ տեսնում։ Պահանջարկը կա տնտեսագիտության հանդեպ։ Մեզ մոտ անվճար համակարգում է մեկ-երկու տեղ հատկացվել այս տարի, չնայած այնպես չէր, որ նախորդ տարիներին շատ տեղեր էին հատկացվել։ Մնացածը վճարովի է, բավականին շատ՝ մոտ 70 հոգի ընդունվել են»,- ասաց ամբիոնի վարիչը։
Նրա խոսքով՝ այնուամենայնիվ, ժամաքանակները զգալիորեն կրճատվել են, դասախոսներ կլինեն, որոնք ժամերի հետ կապված խնդիրներ կունենան։ «Մենք ամբիոնում դասախոսներին հիմնականում հրավիրում ենք Կենտրոնական բանկից, Ազգային ժողովից և այլն։ Հետևաբար այստեղ խնդիր չկա, ժամավճարն էլ է ավելացել։ Մասնագետներն էլ հատուկ գալիս են ուսանողներին գիտելիքներ փոխանցելու։ Ամեն դեպքում ես մեր առումով այդպիսի խնդիր չեմ տեսնում։ Մյուս ֆակուլտետների մասով չեմ կարող ասել»,- իր խոսքը եզրափակեց Հայկ Մնացականյանը:
