«Լուսավոր Հայաստան» խմբակցության պատգամավոր Տարոն Սիմոնյանը հայտարարել է, որ ԱԺ-ում քննարկվող Հակահամաճարակային օրենսդրական փաթեթի դրույթներից մեկը, այն է՝ «Հայաստանում պարտադիր են Առողջապահության համաշխարհային կազմակերպության որոշումները», հակասահմանադրական է: Նա նաև նշել է, որ Հայաստանում օրենքից գերակա կարող են լինել միայն միջազգային պայմանագրերը, որ ստորագրել է Հայաստանը, իսկ միջազգային կազմակերպությունների որոշումները, որոնք իրենց կանոնադրության համաձայն պարտադիր չեն, չեն կարող կիրառվել Հայաստանում: Արդյո՞ք Հայաստանը պետք է անվերապահորեն ընդունի ԱՀԿ որոշումները: Թեմայի շուրջ «Առաջին լրատվական»-ի հետ զրույցում ԱԺ «Իմ քայլը» խմբակցության պատգամավոր, ԱԺ առողջապահության և սոցիալական հարցերի մշտական հանձնաժողովի նախագահ Նարեկ Զեյնալյանը նշեց, որ ԱՀԿ-ն միջազգային մասնագիտական կառույց է, որին անդամակցում են երկրագնդի գրեթե բոլոր երկրները, ԱՀԿ-ն ընդամենը առաջարկներ է ներկայացնում և ցուցումներ է տալիս այս կամ այն իրավիճակում որոշակի գործողությունների կիրառման վերաբերյալ, և երկրներն իրենք են որոշում թե որքանով կիրառեն այդ ցուցումներն ու կանոնները՝ հաշվի առնելով տարբեր, այդ թվում նաև ազգային առանձնահատկություններ:
Նարեկ Զեյնալյանը հավելեց, որ քննարկման արդյունքում Հակահամաճարակային օրենսդրական փաթեթից վերոնշյալ դրույթը հանվել է:
Կորոնավիրոսով վարակվածության դեպքերի թիվը նվազում է: Նարեկ Զեյնալյանի դիտարկմամբ՝ կարելի է արձանագրել, որ կորոնավիրուսի համավարակի հաղթահարման փուլում ենք. «Բայց դա չի նշանակում, որ զգոնությունը պետք է կորցնենք՝ հաշվի առնելով նաև այն հանգամանքը, որ նոր ուսումնական տարվա սկիզբ է»: Նարեկ Զեյնալյանն ընդգծեց՝ թեզը, որ ապրելու ենք կորոնավիրուսի հետ, շարունակվում է մնալ արդիական: Նա նաև ներկայացրեց իր դիտարկումներն այն մասին, թե որ դեպքում է հնարավոր համավարակի երկրորդ ալիքի բռնկումը:
Անդրադառնալով հարցին, թե պատվաստանյութերն արդյոք պարտադիր կլինեն, թե ոչ, Նարեկ Զեյնալյանը հավաստիացրեց, որ այդ մասին դրույթը հստակեցվել է, պատվաստումները ոչ թե պարտադիր, այլ կամավոր են իրականացվելու:
Մանրամասն՝ տեսանյութում: