Հայաստանում անհրաժեշտություն կա ստեղծել գյուղացիական բանկ: «Առաջին լրատվականի» հետ զրույցում նման կարծիք հայտնեց
Ագրարագյուղացիական միություն նախագահ Հրաչ Բերբերյանը:
Կառավարության կողմից գյուղացիական վարկերի սուբսիդավորումը Հ.Բերբերյանը դրական գնահատեց, սակայն նշեց, որ վարկերը պետք է նպատակին ծառայեն. «Ժամանակն է եկել, որ գյուղացիները սեփական բանկն ունենան, որ չընկնեն առևտրային բանկերի դռները, պետք է օգտագործել միջազգային փորձը: Լավ կլիներ, որ այդ գումարներն օգտագործվեն գյուղացիական բանկ ստեղծելու համար, որտեղ բաժնետերերը գյուղացիները կլինեն, ու իրենք էլ կղեկավարեն»:
Վարկերի տոկոսադրույքների վերաբերյալ Հ.Բերբերյանը կարծիք հայտնեց, որ 8-10%-ը միգուցե շատ է, բայց անցած տարիների հետ համեմատած այսօր բավականին լավ է. «Այն ժամանակ մարդիկ փորձում էին գյուղացուց 28-30% շահույթ ունենալ»:
Հիշեցնենք, որ կառավարությունը որոշել է գյուղատնտեսության վարկավորմանը ևս 7.5 մլրդ դրամ հատկացնել: Վարկավորումը կատարվելու է նույն մեխանիզմով, ինչ որ գարնանը։ 125 առավել անապահով սոցիալական խնդիրներ ունեցող համայնքներում վարկերը սուբսիդավորվելու են 6 տոկոսով, որպեսզի վարկերը գյուղացիներին հասնեն 8%-ով և 10%-ով:
